މެންޗެސްޓަރ ޔުނައިޓެޑުން ބާސެލޯނާއިން ލޯނުގެ އުސޫލުން ދޫކޮށްފައިވާ މާކަސް ރަޝްފޯޑު ގަތުމަށް ބާސެލޯނާއިން ނިންމައިފިއެވެ.
މެންޗެސްޓަރ ޔުނައިޓެޑުގެ ޔޫތު އެކަޑަމީއިން ކެރިއަރު ފަށައި އެޓީމުގައި މޮޅު ކުޅުމެއް ދައްކަމުން އައި ރަޝްފޯޑު ޓީމާ ދޭތެރޭ އުފެދުނު ހިތްހަމަ ނުޖެހުންތަކެއްގެ ސަބަބުން ކުލަބު ބަދަލުކުރީ މިދިޔަ ސީޒަނުގައެވެ. ބާސެލޯނާއަށް ބަދަލުވި ފަހުން މި ސީޒަނުގައި ހަތަރު ލަނޑުޖަހައި ހަ ލަނޑު ޖެހުމަށް ރަޝްފޯޑުވަނީ މަގުފަހިކޮށްދީފައެވެ. މީގެ ކުރިން ރަޝްފޯޑާމެދު ވެވިފައިވާ އެއްބަސްވުމުގެ މުއްދަތު ހަމަވުމުން ދާއިމީ ކޮންޓްރެކްޓެއް ހުށަހަޅާނީތޯ ނުވަތަ ދޫކޮށްލާނީތޯ ބާސެލޯނާގެ މެނޭޖުމަންޓްގައި އޮތީ ގޮތެއް ނުނިމިއެވެ. ނަމަވެސް، މިހާރު ރިޕޯޓުތައް ބުނާ ގޮތުން ބާސެލޯނާއިންވަނީ ރަޝްފޯޑު 30 މިލިއަން ޔޫރޯއަށް ގަތުމަށް ނިންމާފައެވެ. އެއަގު ދައްކާ ގޮތަށް ހަމަޖެހިފައިވަނީ ތިން އަހަރު ދުވަހަށް ބަހާލައިގެން އަހަރަކު 10 މިލިއަން ޔޫރޯގެ މަގުންކަމަށް ސްޕެއިންގެ ނޫހެއްކަމަށްވާ މުންޑޯ ޑިޕޯޓިވޯއިންވަނީ ހާމަކޮށްފައެވެ.
ކުޅުންތެރިޔާގެ ކޮންޓްރެކްޓްގެ ކަންކަން އަދި މުޅިން ހަމަޖެހިފައި ނުވާނަމަވެސް، މިހާރު ކުރިޔަށްދަނީ މުއްދަތާމެދު ވާންޖެހޭ އެއްބަސްވުންތައްކަމަށްވެއެވެ. އަދި ކުޅުންތެރިޔާގެ މުސާރަ ލަލީގާގެ މާލީ މިންގަނޑުތަކަށް ފެތޭނެތޯ ބެލުންކަމުގައިވެސް ޚަބަރުތައް ބުނެއެވެ. ކޮންޓްރެކްޓާމެދު ރަޝްފޯޑުގެ އެއްވެސް މައްސަލައެއް ނެތެވެ. ސަބަބަކީ އޭނާ އަނބުރާ ޔުނައިޓެޑަށް ދާން ބޭނުން ނުވާތީއާއި ބާސެލޯނާއާމެދު އޭނާ ހިތްހަމަޖެހޭތީއެވެ.