މި ސީޒަނުގައި ރެލިގޭޝަނުން ކުލަބު ސަލާމަތްވިޔަސް، ލިބުނު ގެއްލުމާގުޅިގެން ގިނަ ކުޅުންތެރިންތަކެއް ވިއްކާލަން ޖެހިދާނެކަމަށް ވެސްޓްހަމްއިން ހާމަކޮށްފިއެވެ.
ވެސްޓްހަމްއިން ހާމަކޮށްފައިވާ ގޮތުގައި ނިމުނު މާލީ އަހަރުގެ ހިސާބުތަކަށް ބަލާއިރު، 104.2 މިލިއަން ޕައުންޑުގެ ގެއްލުމެއް ކުލަބަށްވަނީވެފައެވެ. މިކަމުގެ ސަބަބުން ކިތަންމެ ބޭނުން ނުވިޔަސް، ކުޅުންތެރިންތަކެއް ދޫކޮށްލަން ޖެހޭނެކަމަށް އެކުލަބުންވަނީ ހާމަކޮށްފައެވެ.
ވެސްޓްހަމްގެ މާލީ ހިސާބުތަކަށް ބަލާއިރު، 2023-2024 ގެ މާލީ އަހަރު އެކުލަބު 57.2 މިލިއަން ޕައުންޑްގެ ފައިދާއެއްގައި ނިންމާލިނަމަވެސް، މިދިޔަ އަހަރު އެކުލަބަށްވަނީ ބޮޑުތަނުން ގެއްލުންވެފައެވެ. މިހާ ބޮޑު ގެއްލުމަކާ ކުލަބުން ކުރިމަތިލާން ޖެހުނީ ލީގުގައި ދަށް ނަތީޖާތަކެއް ނެރުމުގެ ސަބަބުންނާއި، ޓީވީއިން ލިބެންޖެހޭ އާމްދަނީ ދަށްވުމާއި، ޔޫރަޕް ފުޓްބޯޅައިގައި ވާދަނުކުރުމާއި، ކުޅުންތެރިން ގަނެ ވިއްކުމުގައި ފައިދާ ހޯދިފައި ނުވާތީއެވެ.
ކުލަބަށް ދިމާވެފައިވާ މި މާލީ ހާލަތުން އަރައިގަތުމަށް އެޓީމުން އެންމެ ފުރަތަމަ ކުރާނެކަމަކީ ކުޅުންތެރިން ބާޒާރުގައި ވިއްކުންކަމަށާއި، އެކަމުން އަރައިނުގަނެވިއްޖެނަމަ، ހިއްސާދާރުންގެ އަތުން އިތުރަށް ފަންޑު ހޯދަންވެސް ޖެހިދާނެކަމަށް ކުލަބުންވަނީ ހާމަކޮށްފައެވެ.
ވެސްޓްހަމް މިވަގުތު އޮތީ ޕްރިމިއަރ ލީގުގެ 18 ވަނާގައެވެ. އެއީ 17 ވަނާގައި އޮތް ނޮޓިންހަމް ފޮރެސްޓަށްވުރެ ދެ ޕޮއިންޓް މަދުން ލިބިގެންނެވެ. ދެން އެޓީމު ކުރިމަތިލާން ޖެހޭނީ ލިވަޕޫލާއެވެ.