ފަތުރުވެރިންގެ މަޤުބޫލު މަންޒިލެއްކަމަށްވާ ދުބާއީގެ ބުރުޖް ޚަލީފާ ކައިރިއަށް އީރާނުގެ ޑްރޯން ހަމަލާއެއް އަރައިފިއެވެ.
މެދުއިރުމަތީގެ ގައުމުތަކުގައި އެމެރިކާއިން ހަދާފައިވާ އަސްކަރީ މަރުކަޒުތަކަށް އަމާޒުކޮށް އީރާނުން ދޭންފެށި ހަމަލާތަކުގެ ތެރެއިން އެކުވެރި އަރަބި އިމާރާތުގެ އެކި ހިސާބުތަކަށް މިއަދު އަންނަނީ އީރާނުން ހަމަލާތައް އަމާޒުކުރަމުންނެވެ. މި ހަމަލާތަކުގެ ތެރެއިން ފަތުރުވެރިން ޚާއްސަކޮށް ރަޝިޔާ ފަތުރުވެރިންގެ މެދުގައި ބޮޑު މަގުބޫލުކަމެއް ލިބިފައިވާ ބުރުޖް ޚަލީފާ ކައިރިއަށް މިވަނީ އީރާނުގެ ހަމަލާއެއް އަމާޒުވެފައެވެ. އެ އިމާރާތާ ކައިރިއަށް އަމާޒުވި ހަމަލާއަށްފަހު އެ އިމާރާތުން މިހާރުވަނީ މީހުން ހުސްކޮށްފައެވެ.
އީރާނުންވަނީ އެމެރިކާއާ ދެކޮޅަށް ދޭ ހަމަލާތައް މެދުއިރުމަތީގައި އެމެރިކާއިން ހަދާފައިވާ އަސްކަރީ މަރުކަޒުތަކަށް އަމާޒުކުރަން ފަށާފައެވެ. އެގޮތުން އަބޫ ދާބީ، ދުބާއީ، ގަތަރުގެ ދޯހާ އަދި ސައުދީ އަރަބިއްޔާގެ ރިޔާދަށްވަނީ ހަމަލާތައް ފޮނުވާލާފައެވެ. މި ހަމަލާތަކުގައި މިހާތަނަށް އާންމުންގެ ތެރެއިން އެކަކު މަރުވެފައިވާ ކަމަށް ޚަބަރުތައް ބުނެއެވެ.
އީރާނުގެ މި ހަމަލާތަކާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕްވަނީ އީރާނަށް ވަރުގަދަ އިންޒާރެއްދީފައެވެ. ހަމަލާތައް ވަގުތުން ހުއްޓާލައި އަމާން ދިނުމަށާއި، އަމާން ނުދީ ހަމަލާތައް ވަރުގަދަ ކުރާނަމަ، އަދި ނިއުކްލިއަރ އެއްވެސް ހަތިޔާރެއް އީރާނުން ބޭނުންކޮށްފިނަމަ، އެމެރިކާގެ އަސްލު ސިފަ ދައްކާލާނެކަމަށް އެމެރިކާގެ ރައީސް ވަނީ ވިދާޅުވެފައެވެ.
ޚަބަރުތައް ދިރާސާ ކުރާ ފަރާތްތަކުން ހާމަކުރާ ގޮތުގައި، އީރާނާއި އެމެރިކާ އާ ދެމެދު ހަނގުރާމަ ކުރާނެކަމަށް ވަރަށް ބޮޑަށް ޔަގީން ކުރެވޭކަމަށާއި، ޔަގީން ނުވާ ކަމަކީ ހަނގުރާމަ ފަށާނެ އިރެއްކަމަށެވެ.