ދިވެހި ފުޓްބޯޅައިގެ ރަސްގެފާނުކަމަށް ގިނަ ބަޔަކު ސިފަކުރާ ނިއުރޭޑިއަންޓް ސްޕޯޓްސް ކުލަބުގެ ކޯޗުކަމުން އަލީ ސްޒޭން އިސްތިއުފާ ދީފިއެވެ.
ސްޒޭން އިސްތިއުފާ ދީފައިވަނީ ރޭގެ ވަގުތެއްގައެވެ. މިކަން ނިއުރޭޑިއަންޓް ސްޕޯޓްސް ކުލަބުގެ ފޭސްބުކް ޕޭޖުގައިވަނީ ހިއްސާކޮށްފައެވެ. ނިއުގެ ކޯޗުކަމުން ސުޒޭން ވަކިވީ އާއިލީ ސަބަބުތަކަކާހުރެ ކަމަށާއި، ކޯޗުކަމުން ވަކިވި ނަމަވެސް، ނިއުގެ ކަންކަމުން މުޅިން ދުރަށް އޭނާ ނުދާނެކަމަށްވެސް ނިއުގެ ބަޔާނުގައިވެއެވެ. އެގޮތުން ނިއުގެ ކުރިމަގަށްޓަކައި ކުލަބަށް އެހީވުމުގެ ގޮތުން އެޓީމުގެ ޓެކްނިކަލް ޑިރެކްޓަރެއްގެ ރޯލު ސުޒޭނަށްވަނީ ހަމަޖައްސާފައެވެ.
ސުޒޭންގެ އިރުޝާދުގެ ދަށުން މި ސީޒަނުގައި ނިއުއިން ކުޅުނު 20 މެޗު ތެރެއިން 12 މެޗު ވަނީ ކާމިޔާބުކޮށްފައެވެ. 5 މެޗުން އެއްވަރުވިއިރު، 3 މެޗުންވަނީ ބަލިވެފައެވެ. ދިރާގު ދިވެހި ޕްރިމިއަރލީގު ނިއުއިން 3 ވަނާގައި ނިންމާލިއިރު، ދާދިފަހުން ނިމުނު ޕްރެޒިޑެންޓްސްކަޕްގެ ސެމީ ފައިނަލުން ބަލިވީ މާޒިޔާ ސްޕޯޓްސް އަތުންނެވެ.
ގައުމީ ފުޓްބޯޅަ ޓީމުގެ ކޯޗުކަންވެސް މީގެ ކުރިން ކޮށްފައިވާ ސުޒޭން، ވިކްޓަރީ ސްޕޯޓްސް ކުލަބު، މާޒިޔާ، ކުލަބް ގްރީން ސްޓްރީޓްސް އަދި ތިނަދޫ ފުޓްބޯޅަ ޓީމަށްވެސް އިރުޝާދު ދީފައިވެއެވެ.