ވިކްޓަރީ ސްޕޯޓްސް ކުލަބުގެ ކޯޗަކަށް މުޙައްމަދު ޝިޔާޒު (މޯހަން) ހަމަޖައްސައިފިއެވެ.
ގައުމީ ފުޓްބޯޅަ ޓީމުގެ ހެޑު ކޯޗަކަށްވެސް މަސައްކަތްކުރި، ޕްރޯ ލައިސަންސް ކޯޗު ވިކްޓަރީގެ ކޯޗުކަމާ ހަވާލުވީ މި ސީޒަނުގެ ނިޔަލަށެވެ. ވިކްޓަރީގެ ކޯޗުކަމުގެ މަގާމު ހުސްވީ އެޓީމުގެ ކޯޗުކަމުގައި ހުރި ސްލޮވާކިޔާގެ ކޯޗު ޖޯޖްލީ ގެރީ ކުލަބުން ވަކިވުމުންނެވެ. ޖޯޖްލީގެ އިރުޝާދުގެ ދަށުން ވިކްޓަރީ ލީގު ނިންމާލާފައިވަނީ ހަވަނާގައި އޮވެގެންނެވެ. ދާދިފަހުން ކުޅުނު ޕްރެޒިޑެންޓްސްކަޕްގެ ގުރޫޕް ސްޓޭޖު ދެމެޗުންވެސް ބަލިވެ ވިކްޓަރީވަނީ ކަޓާފައެވެ.
މޯހަން މީގެ ކުރިން ގައުމީޓީމާއެކު ރަނގަޅު ކާމިޔާބީތަކެއް ހޯދިއެވެ. 2008 ވަނަ އަހަރު ރާއްޖެ ފުރަތަމަ ފަހަރަށް ސާފް ޗެމްޕިއަންޝިޕް ރަންމެޑަލް ހޯދިއިރު އެސިސްޓެންޓް ކޯޗަކަށް ހުރީ މޯހަންއެވެ. އަދި މިދިޔަ އަހަރު ސްރީ ލަންކާ ބަލިކޮށްފައި، ރާއްޖޭން ސައުތު އޭޝިއަން ސުޕަ ކަޕްގެ ތަށި އުފުލާލި ޓީމުގެ ހެޑް ކޯޗެވެ.
ފުރަތަމަ ޑިވިޝަނުގައި މީގެ ކުރިން، މޯހަން ވަނީ، ނިއުރޭޑިއަންޓް، ކްލަބް ވެލެންސިއާ، ކްލަބް އީގަލްސް، މާޒިޔާ، ސުޕަ ޔުނައިޓެޑް ސްޕޯޓްސް (ސަސް) އަދި ދ. ކުޑަހުވަދޫ ފުޓްބޯޅަ ޓީމާއި މަހިބަދޫ ސްޕޯޓްސް ކްލަބަށް އިރުޝާދު ދީފައެވެ.