ލަމިން ޔަމާލް ހެދި ފުރަތަމަ ހެޓްރިކާއެކު ވިލަރެއާލް އަތުން ބާސެލޯނާ މޮޅުވެއްޖެއެވެ.
ރޭ ކުޅެވުނު މިމެޗު ބާސެލޯނާއިން ކާމިޔާބުކުރީ 4-1 ގެ ނަތީޖާއިންނެވެ. މެޗު ފެށިއިރު އެހެން މެޗުތަކާ ޚިލާފަށް ބާސެލޯނާއަށް މެޗުގެ ކޮންޓްރޯލް ގެއްލުނެވެ. ނަމަވެސް ހަންސި ފްލިކްގެ ޓީމުން މާ ގިނައިރުތަކެއްނުވެ މެޗުގެ ކޮންޓްރޯލް ހޯދައި ވިލަރެއާލުގެ ޑިފެންސުން ހެދި ގޯހެއްގެ ފައިދާ ނަގައި ފާމިން ލޮޕޭޒް ދިން ޕާހަކުން މެޗުގެ 28 ވަނަ މިނެޓުގައި ޔަމާލް ފުރަތަމަ ލަނޑު ޖެހިއެވެ. ދެވަނަ ލަނޑު އޭގެ ނުވަ މިނެޓު ފަހުން ޔަމާލް ޖެހީ އަރިމަތިން ލިބުނު ބޯޅައެއް ހިފައިގެން ޕެނަލްޓީ އޭރިއާތެރެއަށްވަދެ ޑިފެންޑަރު ކައިރިން ނައްޓާފައެވެ.
ދެވަނަ ހާފު ވިލަރެއާލުން ފެށީ ކުޅުން ރަނގަޅުކޮށްގެންނެވެ. ނަތީޖާއަކަށްވީ ދެވަނަ ހާފު ފަށައިގެން މާގިނައިރުތަކެއްނުވެ ލަނޑެއް ޖެހުމެވެ. އެލަނޑު ޖެހީ ނިކޮލަސް ޕެޕޭ ނަގައިދިން ކޯނަރަކުން ގޭ އެވެ. އޭގެ އިރުކޮޅެއްފަހުން ނަތީޖާ ހަމަހަމަ ކޮށްލަން ރަނގަޅު ފުރުސަތެއް ވިލަރެއާލަށް ލިބި ބޭކާރުވިއެވެ. ބާސާގެ ތިންވަނަ ލަނޑު ޔަމާލް ޖެހީ 69 ވަނަ މިނެޓުގައެވެ. ހޫލްސް ކުންޑޭ ހުސްކޮށްލާފައި ދިން ޕާހަކުން ހަތަރުވަނަ ލަނޑު ޖަހައިދިނީ ރޮބަޓް ލެވަންޑޮސްކީއެވެ.
މި ނަތީޖާއާއެކު ބާސާ އޮތީ ލީގުގެ އެއްވަނާގައެވެ. އެއީ ދެވަނާގައި އޮތް ވާދަވެރި ރެއާލް މެޑްރިޑަށްވުރެ 4 ޕޮއިންޓް އިތުރަށް ހޯދައިގެންނެވެ.
