މެދުއިރުމަތީގައި ހިނގަމުންދާ ހަނގުރާމައިގެ ސަބަބުން އެ ސަރަހައްދުގެ އެއާލައިންތަކުގެ ދަތުރުތަކަށް ބުރޫއަރާފައިވާތީ، އިންޑިއާ އާއި އޭސިއާގެ އިތުރު އެއާލައިންތައް ރާއްޖެ ގެނައުމުގެ މަސައްކަތް ޓްރާންސް ޕޯޓު މިނިސްޓްރީން ފަށައިފިއެވެ.
އެ މިނިސްޓްރީން ބުނި ގޮތުގައި، މެދުއިރުމަތީގެ މަސްރަހަށް އަންނަމުންދާ ބަދަލުތަކާއި ވައިގެ ސަރަހައްދު ބޭނުންކުރުމަށް އަޅާފައިވާ ފިޔަވަޅުތަކުގެ ސަބަބުން ރާއްޖެއަށް ކުރާ ދަތުރުތަކަށް ވަނީ ހުރަސްތަކެއް އެޅިފައެވެ. މެދުއިރުމަތިން އަންނަ ފްލައިޓުތަކަކީ ރާއްޖޭގެ އިގުތިސާދާއި ޓޫރިޒަމަށް ވަރަށް މުހިންމު ދަތުރުތަކެއް ކަމަށްވާތީ، މި ހާލަތު ވަރަށް ގާތުން ބަލަމުންދާ ކަމަށް ވެސް ބުންޏެވެ.
މި ބަދަލުތަކާ ގުޅިގެން ރާއްޖޭގެ އިގުތިސާދަށް ކޮށްފާނެ އަސަރު ކުޑަކުރުމަށްޓަކައި، ކަމާގުޅޭ ގައުމީ އަދި އިންޓަނޭޝަނަލް އިދާރާތަކާ ގުޅިގެން ޓްރާންސް ޕޯޓު މިނިސްޓްރީން އަންނަނީ މަސައްކަތް ކުރަމުންނެވެ. އެގޮތުން، ދެކުނު އިރުމަތީ އޭސިއާ އާއި އިރުމަތީ އޭސިއާގެ އިތުރުން އިންޑިއާގެ އާ އެއާލައިންތަކެއް ރާއްޖެ ގެނައުމަށް މިހާރު ދަނީ މަޝްވަރާ ކުރަމުންނެވެ.
މި މަސައްކަތުގެ އެންމެ ބޮޑު އަމާޒަކީ، ރާއްޖެއަށް ޒިޔާރަތްކުރާ ޓޫރިސްޓުންނަށާއި، ރާއްޖެއިން ބޭރަށް ދަތުރުކުރާ ދިވެހިންގެ އިތުރުން ރާއްޖޭގައި ދިރިއުޅޭ މީހުންނަށް ކުރިމަތިވެދާނެ ދަތިތައް ކުޑަކޮށް، ދަތުރުފަތުރުގެ ނިޒާމު މެދުކެނޑުމެއް ނެތި ކުރިއަށް ގެންދިއުމެވެ.