ފްރާންސް އަދި ރެއާލްމެޑްރިޑްގެ ތަރި ކިލިއަން އެމްބާޕޭއަށް އިންޖަރީވެ، ތިން ހަފްތާއަށް ކުޅުމާ ދުރަށް ދާންޖެހިއްޖެއެވެ.
އެމްބާޕޭގެ ކަކުލަށް ލިބިފައިވާ އިންޖަރީ ކުލަބުންވެސް ވަނީ ޔަގީންކޮށްދީފައެވެ. މިކަމާގުޅިގެން ރެއާލްމެޑްރިޑް އެންމެ އަވަހަށް ދެން ކުޅޭ ހަތަރު މެޗެއް އެމްބާޕޭއަށް ގެއްލޭނެއެވެ. އެއީ ގެޓާފޭ، ސެލްޓަވީގޯ، މެންޗެސްޓަރ ސިޓީ އަދި އެލްޗޭ އާ ދެކޮޅަށް ކުޅޭ މެޗުތަކެވެ. މީގެ ތެރެއިން ސިޓީގެ މެޗަކީ ޗެމްޕިއަންސްލީގުގެ ކުއާޓާ ފައިނަލުގެ ފުރަތަމަ ލެގުގެ މެޗެވެ. ކުލަބުން ލަފާ ކުރާގޮތުގައި އެމްބާޕޭ ކުޅުމަށް އެނބުރި އާދެވޭނެކަމަށް ބެލެވެނީ ސިޓީއާ ދެކޮޅަށް ދެވަނަ ލެގުގެ މެޗަށެވެ.
މިވަގުތު ލަލީގާގެ ދެވަނާގައި އޮތް ރެއާލްއަށް މިއީ ބޮޑު ގޮންޖެހުމަކަށްވާނެއެވެ. ރެއާލްގެ ކޯޗު އަރްބެލޯއާ ބުނެފައިވާ ގޮތުގައި އަވަސް އަރުވާލައިގެން އެމްބާޕޭ ކުޅުމަށް އަވަހަށް ގެނައުމުގެ ވިސްނުމެއް ނެތްކަމަށާއި ބޭނުންވަނީ ފިޓްނަސް ކޯޗުން 100 އިންސައްތަ ދިނީމާ އެ ކުޅުންތެރިޔާގެ ބޭނުން ހިފަންކަމަށެވެ.