ބެޔާން މިއުނިކަށް ކުޅެމުން އަންނަ އިންގްލެންޑުގެ ފޯވާޑު ހެރީ ކޭން އަނެއްކާވެސް ތިން ރެކޯޑެއް މުގުރާލައިފިއެވެ.
މި ރެކޯޑުތައް ހަދާފައިވަނީ ބެޔާން މިއުނިކް އެންމެ ފަހުން ބްރޫޝިއާ ޑޯޓްމަންޑާ ދެކޮޅަށް ކުޅުނު މެޗުގައި ޖެހި ދެ ލަނޑާއެކުގައެވެ. ޑާ ކްލާސިކާ ނަމުން މަޝްހޫރު މި މެޗު 3-2 އިން ކާމިޔާބުކުރީ ބެޔާން މިއުނިކެވެ.
މި ދެލަނޑާއެކު ކޭން ވެގެން ގޮސްފައިވަނީ އެއް ސީޒަނެއްގައި 46 ލަނޑަށްވުރެ ގިނަ ލަނޑު ޖެހި އިނގިރޭސި ފުރަތަމަ ކުޅުންތެރިޔާއަށެވެ. މި ރެކޯޑު ކުރިން އޮންނަނީ 1931 ވަނަ އަހަރު އެވަޓަން އަށް ޑިކްސީ ޑީން ޖެހި 46 ލަނޑާއެކު އޭނާގެ އަތުގައެވެ. 94 ވީ މި ރެކޯޑުވަނީ ކޭންގެ ދެ ލަނޑާއެކު މުގުރާލާފައެވެ.
އެ މެޗުގައި ދެވަނަ އަށް ކޭން ޖެހި ޕެނަލްޓީއާއެކު އޭނާ ވެގެން ގޮސްފައިވަނީ ބުންޑަސްލީގާގެ ތާރީޚުގައި ޖެހިޖެހިގެން ހަތަރު މެޗެއްގައި ކޮންމެ މެޗެއްގައި 2 ލަނޑުޖެހި 3 ވަނަ ކުޅުންތެރިޔާއަށެވެ. އެ ރެކޯޑު ކުރިން އޮންނަނީ ޑޯޓްމަންޑްގެ ތަރި ލޫތާ އެމަރިޗް އާއި ވޮލްސްބާގްގެ ޓޮމިސްލަވް މަރިކް އަތުގައެވެ.
މީގެ އިތުރުން ކޭންގެ އަމިއްލަ ރެކޯޑެއްވެސް ވަނީ މުގުރާލާފައެވެ. މަދު މެޗުތަކެއްގައި އެންމެ ގިނަ ލަނޑު ޖަހައިގެން އޭނާގެ ލަނޑު ޖެހުމުގެ އެންމެ ރަނގަޅު ސީޒަނަށް މި ސީޒަން މިހާރުވެސްވަނީވެފައެވެ.
ޓޮޓެންހަމުން ބެޔާން މިއުނިކަށް ބަދަލުވެ، ބެޔާން މިއުނިކުގައިވެސް ކޭން އަންނަނީ ތަފާތު މޮޅު ކުޅުމެއް ދައްކާ ލަނޑު ޖެހުމުގެ ހުނަރުވެރިކަން ސާބިތުކޮށްދެމުންނެވެ.