މިޝިގަން ކޯރުގެ އަޑިއަށް ޑައިވިނަށް ގޮސް އުޅުނު ޖެނިފާ ޑައުކަރއަށް އެ ކޯރު އަޑިން ވަނީ ފެހިކުލައިގެ ފުޅިއެއް ފެނިފައެވެ. އެ ފުޅީގެ ރީތިކަމުން ޖެނިފާ އޭތި ނެގި ކަމަށާއި އެތެރޭގައި އެއްޗެއް އޮތްހެން ހީވެގެން ބަލާލިއިރު ފެނުނީ ކުޑަ ނޯޓުކޮޅެއް ކަމަށް އޭނާ ބުންޏެވެ.
އެ ނޯޓުގައި ލިޔެފައި އޮތީ، އެ ނޯޓު ލިބޭ މީހަކު މިޝިގަންގައި އުޅޭ ޖޯޖް މެރޯ ޗެބޯއިގަން ނަމަކަށްކިޔާ މީހަކަށް އެ ފުޅި ރައްދު ކޮށްދިނުމަށް ކަމަށް އޭނާ ބުނެއެވެ. އަދި ފުޅި ފެނުނީ ކޮންތަނަކުންކަން ވެސް އޭނާގެ ގާތުގައި ބުނުމަށް އެ ނޯޓުގައި އޮތްކަމަށް ޖެނިފާ ބުންޏެވެ.
ޖެނިފާ ބުނީ އެ ނޯޓު ލިޔެފައި ވަނީ 1926 ނޮވެމްބަރު މަހުގައި ކަންވެސް އެ ނޯޓުން އެނގެން އޮތެވެ.
ޖެނިފާ ވަނީ އޭނާއަށް ފެނުނު އެ ތަކެތީގެ ފޮޓޯ މީސްމީޑީއާގައި ވެސް ހިއްސާ ކޮށްފައެވެ. އަދި ޖޯޖް މެރޯގެ އާއިލާއަށް ނިސްބަތްވާ އެއްވެސް މީހަކު ހުރިނަމަ އަންގައި ދިނުމަށް ވެސް އޭނާ ވަނީ އެދިފައިވެއެވެ.
ޖޯޖް މެރޯ ހޯދުމަށް އޭނާ ކުރި މަސައްކަތް، އެ ޕޯސްޓުގެ ސަބަބުން ވަނީ ކާމިޔާބު ވެސް ވެފައެވެ. މިހާރު ދުނިޔޭގައި ނެތުމުން ޖޯޖްއާއި ޖެނިފާ ބައްދަލު ނުވި ކަމުގައި ވިޔަސް، އޭނާއަށް ވަނީ ޖޯޖްގެ ދަރިފުޅު މިޝޭލް ޖޯޖް އާއި ބައްދަލު ވެފައެވެ.
އުމުރުން 74 އަހަރުގެ މިޝޭލް ބުނީ އޭނާގެ ބައްޕަ މަރުވުމުގެ ކުރިން އެފަދަ ނޯޓެއްގެ ވާހަކަ ދެއްކި ކަމަށެވެ. ނަމަވެސް އޭރު އޭނާގެ ބައްޕަ އެބުނި އެއްޗެއް ސާފުނުވިނަމަވެސް، މިހާރު އެ ނޯޓުގެ ހަގީގަތް އިނގިއްޖެކަމަށެވެ. އަދި އެ ނޯޓު ހޯދި ޖެނިފާއަށް އޭނާވަނީ ޝުކުރުވެސް އަދާކޮށްފައެވެ.