ސެވިއްޔާ ޑާބީގެ ނަމުން މަޝްހޫރު ރެއާލް ބެޓިސްއާއި ސެވިއްޔާގެ ކުރިމަތިލުން އެއްވަރުވެގެން ނިމިއްޖެއެވެ.
ރެއާލް ބެޓިސްގެ ދަނޑުގައި ކުޅުނު މިމެޗުގެ ފުރަތަމަ ހާފު ނިމުނީ 2-0 ގެ ނަތީޖާއިން ބެޓިސް ކުރީގައި އޮވެގެންނެވެ. ފުރަތަމަ ފަނަރަ މިނެޓުގައި ހިތްގައިމު އޯވަހެޑް ކިކަކުން ލަނޑު ޖަހައިދިނީ މެންޗެސްޓަރ ޔުނައިޓެޑުން އެޓީމަށް ބަދަލުވި ބުރެޒިލްގެ އެންޓޮނީއެވެ. އެޓީމުގެ ފިޑަލްގޯ މެޗުގެ 37 ވަނަ މިނެޓުގައި އިތުރު ލަނޑެއްޖަހައި، ހާފު ނިމުމުގެ ކުރިން ޓީމަށް ރަނގަޅު ލީޑެއް ނަގައިދިނެވެ. އެއާއެކު މުޅި ދަނޑު ސަޕޯޓަރުންގެ ސަޕޯޓުން ގުގުމަމުންދިޔައެވެ.
ނަމަވެސް، ދެވަނަ ހާފުގައި ސެވިއްޔާގެ ކުޅުން ރަނގަޅުކޮށް އެޓީމުންވަނީ އެލެކްސިސް ސަންޗޭޒާއި އިސާކް ރޮމެރޯގެ ލަނޑުތަކުން ނަތީޖާ ހަމަހަމަކޮށްފައެވެ.
މެޗުގެ ފުރިހަމަ ވަގުތު ހަމަވުމާއެކު، ކުރިން ސަޕޯޓު ކުރަމުން އައި ބެޓިސްގެ ސަޕޯޓަރުންގެ ފަރާތުން ފެނުނީ އެހެން މަންޒަރެކެވެ. މަލާމާތްކުރުމާއި ދިމާކުރުމަށް އަޑު ލެއްވުމުގެ އަޑުން މުޅި ދަނޑު އެއް އަޑު ކޮށްލިއެވެ. ސަބަބަކީ ވާދަވެރި ސެވިއްޔާ ކޮޅަށް ދެލަނޑު ޖަހައި ރަނގަޅު ލީޑެއް ނަގާފައި އޮވެ، ފަހުން އެ ލީޑު ގެއްލި ވާދަވެރިންނަށް ޕޮއިންޓެއް ދޭން ޖެހުމެވެ. މި ނުތަނަވަސްކަމުގައި ސަޕޯޓަރުން ތިއްބާ، އެޓީމުގެ އެންޓޮނީވަނީ ސަޕޯޓަރުން ކައިރިއަށް ގޮސް ވާހަކަ ދައްކަން މަސައްކަތްކޮށްފައެވެ. ނަމަވެސް، އެންޓޮނީއާވެސް ސަޕޯޓަރުން ދިމާކޮށްލީއެވެ.
ރެއާލް ބެޓިސް މިވަގުތު އޮތީ 43 ޕޮއިންޓާއެކު 5 ވަނާގައެވެ. އަދި ސެވިއްޔާ އޮތީ 30 ޕޮއިންޓާއެކު 11 ވަނާގައެވެ.