އިނގިރޭސި ޕްރިމިއަރ ލީގުގައި މި ސީޒަނުގައި ކޯނަރާއި ލިބޭ ހިލޭ ޖެހުންތަކުން އިދިކޮޅު ޓީމުތަކުގެ ގޯލަށް އެންމެ ނުރައްކާކުރާ ޓީމުގެ ގޮތުގައި މަޝްހޫރު އާސެނަލްއިން ޗެލްސީގެ މައްޗަށް ކުރި ހޯދައިފިއެވެ.
ރޭ ކުޅެވުނު މިމެޗު އާސެނަލްއިން ކާމިޔާބުކުރީ 2-1 ގެ ނަތީޖާއިންނެވެ. ދެ ލަނޑަކީވެސް ލިބުނު ކޯނަރުތަކުން ޖެހި ލަނޑުތަކެކެވެ. ފުރަތަމަ ލަނޑު ވިލިއަމް ސަލީބާ ޖެހިއިރު، ދެވަނަ ލަނޑު ޖެހީ ޖޫރިއަން ޓިމްބަރއެވެ. ވިލިއަމް ސަލީބާގެ ލަނޑުން ފުރަތަމަ ހާފު ނިމެންދަނިކޮށް އިތުރު ވަގުތުގައި ނަތީޖާ ހަމަހަމަވީ އާސެނަލްގެ ޑިފެންޑަރެއް އަތުން ބައިކޮޅަށް ވަތް ގޯލާއެކުއެވެ. އެ ލަނޑަކީވެސް ޗެލްސީގެ ރީސް ޖޭމްސް ނެގި ކޯނަރެއް ސާފުކޮށްލަން އުޅުމުގެ ތެރޭގައި ޑިފެންޑަރ ހިންކެޕައި ބޮލުގައި ޖެހިފައި ވަތް ލަނޑެކެވެ.
މި މެޗުގައި ޗެލްސީގެ ޕެޑްރޯ ނެޓޯއަށް ދެ ރީނދޫކާޑާއެކު ރަތްކާޑު ދައްކާ ދަނޑުން ފޮނުވާލިއެވެ. އޭގެ ފަހުން ޗެލްސީއިން ނުރައްކާތެރި ދެހަމަލާއެއް އުފެއްދި ނަމަވެސް، އެއް ހަމަލާ އާސެނަލްގެ ކީޕަރު ދިފާއުކުރިއިރު، އަނެއް ހަމަލާ އުފެއްދި އިރު ޗެލްސީ ކުޅުންތެރިން ތިބީ އޮފްސައިޑުގައެވެ.
މެޗުގައި އާސެނަލް ޖެހި ދެ ލަނޑާއެކު އެޓީމުވަނީ ރެކޯޑަކާ އެއްހަމަ ކޮށްފައެވެ. އޮޕްޓަގެ ހިސާބުތަކަށް ބަލާއިރު، އެއް ސީޒަނެއްގައި ކޯނަރުން އެންމެ ގިނަ ލަނޑު ޖެހި ޓީމުތަކުގެ ތެރޭގައި އާސެނަލްވަނީ ހިމެނިފައެވެ. ބާކީ ނުވަ މެޗު އޮއްވާ މި ރެކޯޑާ އެއްހަމަ ކުރީ 16 ލަނޑު ކޯނަރުތަކުން ޖަހައިގެންނެވެ. އާސެނަލް ވަނީ 24/23 ސީޒަނުގައިވެސް އެ އަދަދަށް ޖަހާފައެވެ. އާސެނަލްގެ އިތުރުން ދެން އެ ރެކޯޑު ހިއްސާކުރަނީ 93/92 ސީޒަނުގައި އޯލްހަމް އެތުލެޓިކާއި 17/16 ގައި ވެސްޓްބްރޮމް އަލްބިއޮންއެވެ.
މިމެޗު އާސެނަލް ކާމިޔާބު ކުރުމާއެކު އަނެއްކާވެސް އެއްވަނާގައި 5 ޕޮއިންޓުގެ ލީޑެއް އެޓީމަށް ލިބުނީއެވެ. ނަމަވެސް އެއީ ދެވަނާގައި އޮތް ސިޓީއަށްވުރެ އެއްމެޗު އިތުރަށް ކުޅެގެންނެވެ.