އެމެރިކާއާއި އިސްރާއީލުން ގުޅިގެން ދިން ވައިގެ ހަމަލާތަކެއްގައި އީރާނުގެ ރޫހީ ލީޑަރު އަލީ ޚާމަނާއީ އަވަހާރަކޮށްލުމާ ގުޅިގެން، މެދުއިރުމަތީގެ މަސްރަހު ނުހަނު ބޮޑަށް ގޯސްވެ، "އެކްސިސް އޮފް ރެސިސްޓެންސް" ނުވަތަ އީރާނަށް ތާއީދުކުރާ ހަނގުރާމަވެރި ޖަމާއަތްތަކުގެ އިއްތިހާދު ބޮޑު ގޮންޖެހުމަކާ ކުރިމަތިލާން ޖެހިއްޖެއެވެ.
ދަހިތަކެއް ވަންދެން އީރާނުގެ ދިފާއީ އައްޑަނައެއްގެ ގޮތުގައި އޮތް މި އިއްތިހާދުގެ އެންމެ އިސް ކޮމާންޑަރު އަވަހާރަވުމާއި، މުހިންމު ސަރަހައްދުތަކުގެ ގުޅުންތައް ކެނޑިގެން ދިއުމާއެކު، މި އިއްތިހާދު މިހާރު ފެންނަނީ ވަކިވަކިވެފައިވާ ބައެއްގެ ގޮތުގައެވެ. ތެހެރާން ޔުނިވަރސިޓީގެ ޕްރޮފެސަރެއް ކަމަށްވާ ހަސަން އަހުމަދިއަން އިންޒާރު ދެއްވި ގޮތުގައި، އީރާނުން މިހާރު އޮތީ މި ހަމަލާގެ ބަދަލުހިފުމަށް "ހުރިހާ އެއްޗެއް އަންދާލަން" ތައްޔާރަށެވެ.
ނަމަވެސް، އީރާނުން ބޮޑު ބަދަލެއް ހިފާނެ ކަމަށް ބުނި ނަމަވެސް، ލުބުނާނު، ޔަމަން އަދި އިރާގުގައި ތިބި އީރާނުގެ މަދަދުގާރު ޖަމާއަތްތަކުގެ އަމަލުތަކުން ފެންނަނީ މަޑުޖެހުމެކެވެ.
ލުބުނާނުގެ ހިޒްބުالله އިން މި ހަމަލާ ކުށްވެރިކޮށްފައިވީ ނަމަވެސް، އެ ޖަމާއަތުގެ ބަޔާންތަކުން ފެންނަނީ އިސްރާއީލަށް ހަމަލާދިނުމުގެ ބަދަލުގައި ދިފާއީ އުކުޅުތަކަކަށް އިސްކަންދޭ މަންޒަރެވެ. ސޫރިޔާގެ ސަރުކާރު ވެއްޓުމާ ގުޅިގެން ހިޒްބުالله އަށް އީރާނުން ލިބެމުންދިޔަ ހަތިޔާރާއި އެހީގެ މަގުތައް ބަންދުވެ، އެ ޖަމާއަތް މިހާރު ވަނީ އެކަހެރިވެފައެވެ.
ޔަމަނުގެ ހޫތީންގެ ލީޑަރު އަބްދުލް މާލިކް އަލް ހޫތީ ވިދާޅުވީ އީރާނަކީ ވަރުގަދަ ގައުމެއް ކަމަށާއި އީރާނުން ބަދަލުހިފާނެ ކަމަށެވެ. ނަމަވެސް، ޔަމަނުގެ ތެރޭގައި ސަރުކާރުގެ ފައުޖުތަކުން ހޫތީންނާ ދެކޮޅަށް ފަށާފައިވާ އޮޕަރޭޝަންތަކުގެ ސަބަބުން، ހޫތީންނަށް ވަނީ އަމިއްލަ ސަލާމަތަށްޓަކައި އީރާނުގެ ހަނގުރާމައިގެ ތެރެއަށް ވަނުމަށް ފަސްޖެހިފައެވެ.
އިރާގުގައި ތިބި އީރާނަށް ތާއީދުކުރާ ހަނގުރާމަވެރި ޖަމާއަތްތަކަށް ވެސް ވަނީ ބޮޑު ނުތަނަވަސްކަމަކާ ކުރިމަތިލާން ޖެހިފައެވެ. އެމެރިކާއިން އެ ޖަމާއަތްތައް ނައްތާލާނެ ކަމުގެ އިންޒާރު ދީފައިވާއިރު، އީރާނުގެ ރިވޮލިއުޝަނަރީ ގާޑްސްގެ އިސް ކޮމާންޑަރުން އަވަހާރަވުމުން، އެ ޖަމާއަތްތައް ކޮންޓްރޯލް ކުރާނެ މަރުކަޒީ ބާރެއް މިހާރު ނެތެވެ. މީގެ ސަބަބުން އިރާގުގެ ސަރުކާރުން ބޭނުންނުވާ ހަނގުރާމައެއްގެ ތެރެއަށް އެ ގައުމު ވެއްޓިދާނެ ކަމުގެ ބިރު ވަނީ ހީވެފައެވެ.
ޚާމަނާއީ އަވަހާރަކޮށްލުމުން "އެކްސިސް އޮފް ރެސިސްޓެންސް" ގެ ފިކުރީ އަދި ހިންގުމުގެ އޮނިގަނޑު ވަނީ މުޅިން ރޫޅިފައެވެ. މީގެ ކުރިން އެއްބައިވަންތަ އަސްކަރީ ބާރެއްގެ ގޮތުގައި ފެނުނު މި އިއްތިހާދު، މިހާރު ބަދަލުވެފައިވަނީ އަމިއްލަ ސަލާމަތަށް މަސައްކަތްކުރާ ވަކިވަކި ޖަމާއަތްތަކަކަށެވެ. މީގެ ސަބަބުން މެދުއިރުމަތީގެ ކުރިމަގު މިހާރު އޮތީ ނޭނގުމެއްގެ ތެރޭގައެވެ.