ދުނިޔޭގެ ސައިންސްވެރިން އަންނަނީ ތިމާވެއްޓާ ރައްޓެހި އަދި ސިއްހަތަށް ފައިދާހުރި ތަފާތު އުފެއްދުންތައް އުފެއްދުމަށް ގިނަ މަސައްކަތްތަކެއް ކުރަމުންނެވެ. އެގޮތުން، ބްރެޒިލްގެ ސައިންސްވެރިން މިވަނީ ކޮކޯ އުފެއްދުމަށްފަހު ބާކީވާ ތޮށިގަނޑު ބޭނުންކޮށްގެން، އާދަޔާޚިލާފު "ޗޮކްލެޓް މާމުއި" އެއް އުފައްދާފައެވެ. މި ހޯދުމަކީ 'ފުންޑަސާއޮ ޑި އަމްޕާރޯ އަ ޕެސްކީޒާ ޑޫ އެސްޓާޑޯ ޑި ސާއޮ ޕައުލޯ' އިން ކުރިއަށްގެންދިޔަ ދިރާސާއެއްގެ ނަތީޖާއެވެ.
މި އައު އުފެއްދުން ތައްޔާރުކޮށްފައިވަނީ ކޮކޯގެ ބާކީވާ ބައިތައް މާމުއިއާ އެއްކޮށްލައިގެންނެވެ. މި މަސައްކަތުގައި ސައިންސްވެރިން ބޭނުންކޮށްފައިވަނީ "އަލްޓްރާސައުންޑް ވޭވްސް" ނުވަތަ އަލްޓްރާސައުންޑް ރާޅުތަކެވެ. މި ޓެކްނޮލޮޖީގެ އެހީގައި، އެއްވެސް ކެމިކަލެއް ނުވަތަ ސިންތެޓިކް ސޯލްވެންޓެއް ބޭނުންކުރުމަކާ ނުލައި، ކޮކޯ ތޮށީގައި ހުންނަ ސިއްހީ ގޮތުން ފައިދާހުރި މާއްދާތައް މާމުއިގެ ތެރެއަށް ދަމައިގަނެއެވެ. މިއީ މުޅިންވެސް ތިމާވެއްޓާ ރައްޓެހި، ދެމެހެއްޓެނިވި "ގްރީން" މަރުހަލާއެކެވެ.
މިގޮތަށް އުފައްދާފައިވާ މާމުއީގައި ގިނަ އަދަދަކަށް އެންޓިއޮކްސިޑެންޓްތަކާއި ހަށިގަނޑަށް ބޭނުންތެރި ޤުދުރަތީ ހަކަތަ ލިއްބައިދޭ މާއްދާތައް ހިމެނެއެވެ. މިއީ އާދައިގެ މާމުއިއަށްވުރެ ސިއްހީ ގޮތުން މާ ފައިދާ ބޮޑު އުފެއްދުމެއްގެ ގޮތުގައި ސައިންސްވެރިން ސިފަކުރެއެވެ.
މި އައު "ޗޮކްލެޓް މާމުއި" އަކީ ހަމައެކަނި ކެއުމަށް ބޭނުންކުރާ އެއްޗެއްގެ ގޮތުގައި ނުބެލެވެއެވެ. މިއީ މަތީ ފަންތީގެ "ގޯމޭޓް" ކާނާގެ ބާވަތްތަކުގައާއި، މޫނާއި ހަންގަނޑު ރީތިކުރުމަށް ބޭނުންކުރާ ކޮސްމެޓިކްސް ސާމާނު އުފެއްދުމުގައިވެސް ބޭނުންކުރެވިދާނެ އެއްޗެކެވެ.
މި ހޯދުމުގެ ސަބަބުން، ކޮކޯ އުފައްދާ ސިނާއަތުން އުކާލެވޭ ތަކެތި ބޭނުންކޮށްގެން، އިންސާނުންގެ ދުޅަހެޔޮކަމަށް މަގުފަހިވާނެ އައު ދޮރުތަކެއް ހުޅުވިގެން ގޮސްފިއެވެ. މިއީ ކާބޯތަކެތީގެ ސައިންސާއި ދެމެހެއްޓެނިވި ތަރައްގީގައި ލިބުނު ވަރަށް ބޮޑު ކުރިއެރުމެކެވެ.
ހަވާލާ: ސައިންސް ޑެއިލީ 2026.