މެންޗެސްޓަރ ޔުނައިޓެޑަށް ކުޅެމުން އަންނަ ބުރެޒިލްގެ މިޑްފީލްޑަރ ކަސެމީރޯ މި ސީޒަނަށްފަހު ކުލަބު ދޫކޮށްލަން ނިންމާފައިވާތީ އެތަން ފޫބެއްދުމަށް ތިން ކުޅުންތެރިން ހޯދުމަށް ޔުނައިޓެޑުން މަސައްކަތް ފަށައިފިކަމަށް ޚަބަރުތައް ފެތުރިއްޖެއެވެ.
ޚަބަރުތައް ބުނާގޮތުން ކަސެމީރޯގެ ބަދަލުގައި ޓީމުގެ މެދުތެރެއަށް ގެންނަން ތިން ކުޅުންތެރިންނަށްދަނީ ފާރަލަމުންނެވެ. އަދި އެ ތިން ކުޅުންތެރިން ހޯދުމަށް 170 މިލިއަން ޕައުންޑް ޚަރަދުކުރަން ކުލަބުން އޮތީ ތައްޔާރަށްކަމަށްވެއެވެ. އެގޮތުން އެ ލިސްޓުގެ އެންމެ ކުރީގައި އުޅެނީ ނިއުކާސަލް ޔުނައިޓެޑުގެ މެދުތެރެއަށް ކުޅެމުން އަންނަ ބުރޫނޯ ގިމަރޭސްއެވެ. އޭނާއަކީ ނިއުކާސަލް ޔުނައިޓެޑުގައިވެސް މުހިންމު ދައުރެއް އަދާކުރަމުން އަންނަ ކުޅުންތެރިއެކެވެ. ގިމަރޭސް ހޯދުމަށް ޔުނައިޓެޑުގެ ބޯޑަށް ކަސެމީރޯވެސް ލަފާދީފައިވީނަމަވެސް، އެކަންވާނީ އުނދަގޫކަމަކަށެވެ. ސަބަބަކީ، ނިއުކާސަލްއިން އެކުޅުންތެރިޔާގެ ކޮންޓްރެކްޓް އައު ކުރުމަށް މަސައްކަތް ކުރަމުންދާތީއާއި އެޓީމުގެ ކޯޗުގެ ޕްލޭންގައި އެކުޅުންތެރިޔާގެ މުހިންމުކަން އިންތިހާއަށް ބޮޑުވެފައިވާތީއެވެ.
ދެވަނަ ކުޅުންތެރިއަކީ ބުރޫނޯ ގިމަރޭސްއާއެކު ނިއުކާސަލްއަށް ކުޅެމުން އަންނަ ސަންޑްރޯ ޓޮނާލީއެވެ. އިޓަލީގެ މިޑްފީލްޑަރ ޔުވެންޓަސްއަށް އެނބުރި ދާން ބޭނުންވިނަމަވެސް، ޔުވެންޓަސްއަށް ދިމާވެފައިވާ މާލީ ހާލަތުގެ ސަބަބުން އެޓީމުން ޓޮނާލީ ގެންދިޔުމަށްވުރެ ގާތީ ނުގެންދިޔުމެވެ. އެހެންކަމުން ޔުނައިޓެޑަށް ޓޮނާލީ ގެންދާނެކަމަށް ވަރަށް ބޮޑަށް ބެލެވެއެވެ. ނަމަވެސް އެކަންވެސް އެހާ ފަސޭހައެއްނުވާނެއެވެ. ސަބަބަކީ ނިއުކާސަލްއިން ޓޮނާލީ ހިފެހެއްޓުމަށް ކުރެވެން އޮތް ހުރިހާ މަސައްކަތެއް ކުރާނެތީއެވެ.
ދެން ގެންދާނެކަމަށް އަޑުތައް ފެތުރިފައިވަނީ ނޮޓިންހަމް ފޮރެސްޓަށް ކުޅެމުން އަންނަ އެލިއޮޓް އެންޑަސަންއެވެ. އެޓީމުގެ ކްރިއޭޓިވް މިޑްފީލްޑަރު ޔުނައިޓެޑަށް ގެންދިޔުމަށް މިދިޔަ ހޫނު މޫސުމުގެ ޓްރާންސްފަރ މާކެޓުން ފެށިގެން އަންނަނީ ފާރަލަމުންނެވެ. މި ސީޒަނުގައި އޭނާ ދައްކަމުން އަންނަ ކުޅުމަށް ގިނަ ބައެއްގެ ސަމާލުކަންވަނީ ލިބިފައެވެ. އެގޮތުން ޒުވާން މި ކުޅުންތެރިޔާ ޔުނައިޓެޑަށް ގެނެސްފިނަމަ ވެގެންދާނީ ކުރިމަގަށް އެޅޭނެ ރަނގަޅު ފިޔަވަޅެއްކަމަށް ކުޅިވަރުގެ މާހިރުންބުނެއެވެ. އަދި އެންޑަސަން އެ ދައްކާ ކުޅުން ދަމަހައްޓައިފިނަމަ، ޖޫޑް ބެލިންހަމަށްވުރެ މަގުބޫލު ކުޅުންތެރިއަކަށް ވެގެންދާނެކަމަށްވެސް އެފަރާތްތަކުން ހާމަކުރެއެވެ.
ޔުނައިޓެޑުގެ ކޯޗުކަމާ ކެރިކް ހަވާލުވިފަހުން އަދި ބަލިވެފައިނުވާއިރު، ކުޅުންތެރިން ހޯދުމުގެ ކަންކަން ބިނާވާނީ ކެރިކްގެ ކުރިމަގަށްވެސް ވާގޮތަކުންނެވެ. މިހާރު އެންމެ ބޮޑަށް ބެލެވެނީ ކެރިކަށް ޔުނައިޓެޑުގެ ކޯޗުކަން ދާއިމީކޮށް ހަމަޖެހޭނެކަމަށެވެ. އެހެން ވެއްޖެނަމަ، ކުރިން މި ފާހަގަކުރި ތިން ކުޅުންތެރިންވެސް ޔުނައިޓެޑަށް އައުން ކައިރިއެވެ.