މާބޮޑަށް ސެޓްޕީސްތަކަށް ބަރޯސާވެގެން ޓީމުތައް ކުޅެމުން އަންނާތީ ލީގުގެ ފޯރި ގެއްލޭކަމަށްބުނެ އެކަމަށް ލިވަޕޫލް ކޯޗު އާރން ސްލޮޓް ފާޑުކިޔައިފިއެވެ.
ލިވަޕޫލުގެ ކޯޗުކަމާ ހަވާލުވި ފުރަތަމަ ސީޒަނުގައި އެޓީމަށް ލީގު ކާމިޔާބުކޮށްދިން ކޯޗު ބުނެފައިވާ ގޮތުގައި މިހާރު ހުރިހާ ޓީމުތަކުންވެސް ނަތީޖާ ނެރުމަށް ބޮޑަށް ބަރޯސާވެފައި އޮންނަނީ ސެޓްޕީސްތަކަށްކަމަށެވެ. ޚާއްޞަކޮށް ކޯނަރުތައް ނަގާއިރު ކުޅުންތެރިން އަމަލުކުރާ ގޮތުން ލީގު ބަލާހިތްވެސް ކެނޑޭ ހިސާބަށް ގޮއްސިކަމަށް އޭނާ ފާހަގަކުރިއެވެ.
މި ސީޒަނުގައި ޓީމުތަކުން ޖެހި ލަނޑުތަކުގެ ތެރެއިން ޕެނަލްޓީ ނުހިމަނާ ސެޓްޕީސްތަކުން ޖެހި ގޯލުގެ އިންސައްތަ އުޅެނީ 27.5 އިންސައްތާގައެވެ. އެއީ 2009 ގެ ސީޒަނަށްފަހު ދެވަނަ އަށް އެންމެ މަތީ އަދަދެވެ. މިކަމުގައިވެސް އެންމެ ކުރީގައި އުޅެނީ އާސެނަލްއެވެ. އެޓީމުން މި ސީޒަނުގައި މިހާތަނަށް 16 ލަނޑުވަނީ ކޯނަރުތަކުން ޖަހާފައެވެ. އެއީ އެއް ސީޒަނެއްގައި ކޯނަރުން އެންމެ ގިނަ ލަނޑުޖެހުމުގެ ރެކޯޑާ އެއްހަމަ އަދަދެކެވެ. ކުރިން އެވަރަށް ކޯނަރުން ލަނޑުޖަހާފައިވަނީ އާސެނަލްގެ އިތުރުން ވެސްޓްބްރޮމް އާއި އޯލްޑްހަމްއެވެ. މިރެކޯޑު މުގުރާލުމަށް ބާކީ އަދި ނުވަ މެޗު އާސެނަލްއަށް އެބަ އޮތެވެ.
ސްލޮޓް އިތުރަށްބުނީ ކޯނަރުތަކަށް އެހާބޮޑަށް އަހައްމިއްޔަތުކަމެއްދެނީ ޕްރިމިއަރ ލީގުގައިކަމަށާއި އެހެން ލީގުތަކުގައި އެ މަންޒަރު ނުފެންނަކަމަށެވެ. އަދި އެ ލީގުތަކުގައި ކީޕަރަށް ކިރިޔާ ފައުލެއް ވިޔަސް ރެފްރީން ފިޔަވަޅު އަޅާއިރު، ޕްރިމިއަރ ލީގުގައި ކޯނަރު ނަގާއިރު ކީޕަރު މޫނުމަތީ ޖަހާފައިވެސް ގޯލު ޖަހަންވީކަމަށެވެ. މި އައި ބަދަލު ގަބޫލުކުރަންޖެހޭކަމަށާއި މިގޮތަށް މިކަން ދިހަވަރަކަށް އަހަރު އޮވެދާނެކަންވެސް ގަބޫލުކުރާކަމަށެވެ. ނަމަވެސް، އެކަމަކީ އޭނާ އެއްވެސް ވަރަކަށް ތާއީދުކުރާކަމެއް ނޫންކަމަށެވެ.