ނިއުރޭޑިއަންޓް ސްޕޯޓްސް ކުލަބުގެ ހުސްވެފައިވާ ކޯޗުކަމުގެ މަގާމަށް އެކުލަބުގެ ޓެކްނިކަލް ޑައިރެކްޓަރަކަށް ހުރި އަންދްރޭ ކައިންޒޯސް ހަމަޖައްސައިފިއެވެ.
ކައިންޒޯސް ކޯޗަކަށް ހަމަޖެއްސިކަން އަންގާ ނިއުއިން ސޯޝަލްމީޑިއާގައި އާއްމުކުރި ޕޯސްޓެއްގައި ބުނެފައިވަނީ، އަންދުރޭ [ކައިންޒޯސް] އަކީ ފުޓްބޯޅައިގެ ދާއިރާގައި ގިނަ ތަޖުރިބާތަކެއް ލިބިފައިވާ، ހުނަރުވެރި ކޯޗެއްކަމަށާއި އޭނާގެ އިރުޝާދުގެ ދަށުން ނިއު ރޭޑިއަންޓުން ކުރިއަށް އޮތް މުބާރާތުގައި [އެފްއޭ ކަޕްގައި] ކާމިޔާބީގެ އައު އުސްމިންތަކަކަށް ވާސިލުވާނެ ކަމަށް އުންމީދު ކުރާކަމަށެވެ. އަދި ފަޚުރުވެރި ނިއު ރޭޑިއަންޓް އަލުން އަނބުރާ ކުރީގެ ރަސްކަމަށް ގެންދިއުމަށް ކުރާ މަސައްކަތުގައި އަންދުރޭއަށް ފުރިހަމަ ކާމިޔާބީއަށް އެދޭކަމުގައިވެސް އެ ބަޔާނުގައިވެއެވެ.
އުމުރުން 52 އަހަރުގެ ކައިންޒޯސް ނިއުއިން ގެނައީ މި ޖަނަވަރީ މަހުއެވެ. މިހާތަނަށް އޭނާ މަސައްކަތްކުރަމުން އައިސްފައިވަނީ އެކުލަބުގެ ޓެކްނިކަލް ޑައިރެކްޓަރުގެ މަގާމުގައެވެ. ދާދިފަހުން ކުލަބުގެ ކޯޗުކަމުގައި ހުރި އަލީ ސުޒޭން ކޯޗުކަމުން ވަކިވުމާ ގުޅިގެން އޭނާއަށްވަނީ ޓެކްނިކަލް ޑައިރެކްޓަރުގެ މަގާމު ހަވާލުކޮށްފައެވެ.