ރަމަޟާން މަހާ ދިމާކޮށް ރާއްޖެ އެތެރެކުރާ ކާބޯތަކެއްޗާއި އެހެނިހެން ޟަރޫރީ މުދާ ބޭލުމާއި، އެ ތަކެތި ކްލިއަރ ކުރުމުގެ މަސައްކަތް ބާރުމިނެއްގައި ކުރަމުންދާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.
އެމްޕީއެލްއިން ހާމަކުރި ގޮތުގައި، ރޯދަމަހަށް ބޭނުންވާ މުދާ ވީހާވެސް އަވަހަކަށް ބާޒާރަށް ނެރުމަށްޓަކައި އެ ކުންފުނީގެ އޮޕަރޭޝަންސް ޓީމުތަކުން ދަނީ މެދުކެނޑުމެއްނެތި ބުރަ މަސައްކަތްތަކެއް ކުރަމުންނެވެ. ވަކިން ހާއްސަކޮށް، ކޮންޓޭނަރުތަކުގައި ގެންނަ މުދަލާއި ކާބޯތަކެތީގެ ބާވަތްތައް އަވަހަށް ކްލިއާ ކުރުމަށް ވަނީ ހާއްސަ އިސްކަމެއް ދީފައެވެ.
މި ދުވަސްވަރަކީ އާންމު މަސްމަހަށްވުރެ މުދާ އެތެރެކުރާ މިންވަރު އިތުރު ދުވަސްވަރަކަށް ވުމުން، މަސައްކަތުގެ ވޮލިއުމް ވަނީ އެތައް ގުނައަކަށް އިތުރުވެފައެވެ. ނަމަވެސް އެމްޕީއެލްގެ މުވައްޒަފުންގެ މެދުގައި އޮތް ބަދަހި ގުޅުމާއެކު، އެއްވެސް މަޑުޖެހުމެއް ނެތި މުދާ ބާޒާރަށް ނެރުމުގެ މަސައްކަތް ކުރިއަށްދާ ކަމަށް އެ ކުންފުނީގެ އިއުލާނުގައި ފާހަގަކޮށްފައިވެއެވެ.
އެމްޕީއެލްއިން އިތުރަށް ބުނީ، މި އޮޕަރޭޝަންތައް ހަލުވިކަމާއެކު ކުރިއަށްދަނީ މުވައްޒަފުންގެ ސާބިތުކަމާއި ވަރުބަލިކަމެއް ނެތި ކުރާ މަސައްކަތުގެ ސަބަބުން ކަމަށެވެ. މީގެ ސަބަބުން ރޯދަމަހަށް ބޭނުންވާ ތަކެތި ތަދުވިޔަ ނުދީ ބާޒާރުން ލިބޭނެ މަގު ފަހިވެގެންދާނެއެވެ.