މެންޗެސްޓަރ ޔުނައިޓެޑަށް ކުރިން ކުޅުނު އަދި މިހާރު ފްރާންސްގެ އޮލިމްޕިކް މާސޭގައި މޮޅު ކުޅުމެއް ދައްކަމުން އަންނަ އިނގިރޭސި ކުޅުންތެރިޔާ މޭސަން ގްރީންވުޑް އަންނަ ވޯލްޑްކަޕްގައި އިންގްލެންޑުގެ ބަދަލުގައި ޖަމެއިކާއަށް ކުޅުން ކައިރިކަމަށް ރިޕޯޓުތައް ބުނެފިއެވެ.
މެންޗެސްޓަރ ޔުނައިޓެޑަށް ކުޅެމުން އަންނަނިކޮށް ގްރީންވުޑްގެ މައްޗަށް އުފުލުނު ރޭޕްގެ ތުހުމަތުތަކަކާ ގުޅިގެން 2022 ވަނަ އަހަރު ޔުނައިޓެޑުން އޭނާ ސަސްޕެންޑްކުރިއެވެ. އަދި އެއަހަރު އޭނާ ޔުނައިޓެޑު ދޫކޮށް ދުވަސްކޮޅަކު އެއްވެސް ޓީމަކާ ނުގުޅި ދުވަސްކޮޅަކު ހުއްޓެވެ. އެއަށްފަހު އޭނާގެ މައްޗަށް އުފުލި ހުރިހާ ދައުވާއެއް އަނބުރާ 2023 ވަނަ އަހަރު ގެންދިޔުމުން އެ އަހަރު ލޯނުގެ ދަށުން ގެޓާފޭއަށް ބަދަލުވެ 33 މެޗުން 8 ގޯލު އެޓީމަށް ޖަހައިދިނެވެ. އަދި މާސޭއަށް ޖެހިގެން އައި އަހަރު 26.7 މިލިއަން ޕައުންޑަށް ބަދަލުވެ އަންނަނީ މޮޅު ކުޅުމެއް ދައްކަމުންނެވެ. މިދިޔަ ސީޒަނުގައި 22 ލަނޑު އެޓީމަށް ޖަހައިދީ އެޓީމުގެ އެންމެ މުހިންމު އެއްކުޅުންތެރިޔަކަށް މިހާރު އޭނާވަނީ ވެފައެވެ.
މިހާރު އުފެދޭ ސުވާލަކީ ގްރީންވުޑް އަންނަ ވޯލްޑްކަޕްގައި ކުޅޭނީ އިންގްލެންޑަށްތޯ ނުވަތަ ޖަމެއިކާއަށްތޯ ކުރެވޭ ސުވާލެވެ. މިކަމާމެދު ގްރީންވުޑް އަދި ވަކި އެއްޗެއް ހާމަކޮށްފައި ނުވިނަމަވެސް، އޭނާގެ މައްޗަށް އުފުލުނު ދައުވާތަކާ ގުޅިގެން އޭނާ ފެނުން އެންމެ ގާތީ އޭނާގެ އަސްލު އުފަން ގައުމުކަމަށްވާ ޖަމެއިކާކަމަށް ރިޕޯޓްތައް ބުނެއެވެ.
މިއަހަރު ޖޫންމަހު އޮންނަ ވޯލްޑްކަޕަށް ޖަމެއިކާ އަދި ކޮލިފައިއެއްނުވެއެވެ. ކޮލިފައިވެވެން އޮތީ ކޮލިފައިން ބުރުގެ ސެމީފައިނަލް ޕްލޭއޯފް މެޗުގައި ނިއު ކަލެޑޯނިއާ ބައްދަލުކުރާ މެޗުން ވާގޮތަކުންނެވެ.