ހަޔާތުގެ ކޮންމެ ދުވަހެއް އިންސާނާ ހޭދަކުރަނީ މި ދުނިޔޭގެ ހަޔާތުގައި ކޮންމެވެސް އަމަލެއް ކުރުމުގައެވެ. މި އަމަލުތަކުގައި އިންސާނާ އަލަށް ދަސްކުރާ ކިތަންމެ ކަމެއް ވާނެއެވެ. ތަހުޒީބާއި ނާތަހުޒީބު އިންސާނާ ދަސްކުރަނީ ދުނިޔޭގެ ތަޖުރިބާއިންނެވެ. ނަމަވެސް ތަހުޒީބާއި ނާތަހުޒީބުގެ ހަގީގީ މާނަ އިންސާނާ އޮޅުވާލައިފައިވަނީ މަދެއްކޮށެއް ނޫނެވެ.

ތަހުޒީބު ވުމަކީ ކޮބައިހެއްޔެވެ؟ ތަހުޒީބު ވުމަށްޓަކައި ތިބާގެ "އަސްލު" އޮޅުވާލަން ޖެހޭހެއްޔެވެ؟ އެކާވީސްވަނަ ގަރުނާއި ދުނިޔެ ބައްދަލު ކުރިއިރު، ދިވެހި ގައުމު މިވަނީ "ތަހުޒީބު" ގައުމަކަށް ވެފައެވެ. ދިވެހީން މިވަނީ ތަހުޒީބު ވެފައެވެ. ނަމަވެސް ދިވެހިންނަށް ވެވިފައި މިހިރަ ތަހުޒީބަކީ ހަގީގީ ތަހުޒީބުކަމާއިމެދު ސުވާލު އުފެދެއެވެ. ސަބަބުތަކެއް ނެތިއެއްނޫނެވެ.

ދިވެހިންނަށް ތަހުޒީބުގެ ނަމުގައި މިއަދު ކުރެވެމުންދާ އަމަލުތަކުގެ ސަބަބުން ދިވެހި ކާބަފައިންނަށް ކުރެވެނީ މަލާމާތެވެ. އެބައިމީހުންގެ ގަދަރަށް ކުރެވެނީ ފުރައްސާރައެވެ. އެމީހުން ދިވެހި ގައުމަށްޓަކައި ވީ ގުރުބާނީގެ އަގު، މިއަދުގެ "ތަހުޒީބު" ދިވެހިން އެބައިމީހުންނަށް ދެނީ މަލާމާތާއި ނަފްރަތުންނެވެ. ޖެއްސުމާއި ބަދުބަހުންނެވެ. އަސްލު ދިވެހީންގެ ހަގީގީ ސިފަތައް، ތަހުޒީބުގެ ނަމުގައި ދިވެހި މުޖުތަމައިން ބޭރުކޮށްލައިފިއެވެ. އޭގެ ބަދަލުގައި ދިވެހިންނާއި ބީރައްޓެހި، ދިވެހިންނާއި ނުބައްދަލު ކަސިޔާރު ވިސްނުމެއް ދިވެހިން އިހްތިޔާރުކޮށްފިއެވެ.

ތަހުޒީބަކީ މުއްސަނދިކަމާއި ބާރުވެރިވެރިކަން ކަމުގައި ދެކެވެންފަށައިއެވެ. އިމެން ނެތް މިނިވަންކަމަކީވެސް ތަހުޒީބުކަމުގައި ދެކޭބަޔަކު ދިވެހިންގެ ތެރޭގައި މަދެއް ނޫނެވެ. އަދި ކިއެއްތަ، ގައުމިއްޔަތާއި މާދަރީ ބަހަށް ދޯޅަވާ ދޯޅަވުމާއި، އަމިއްލަ ސަގާފަތް، ދޫކޮށް ފަރަންޖީގެ ވައްޓަފާޅިއާއި އެބައިމީހުންގެ ބަސްތަކަށް ދޯޅަވުމަކީވެސް އަމުދުން ތަހުޒީބުކަމުގައި ދިވެހިންގެ ގިނަބަޔަކު ދެކެއެވެ.

ގިނަ ފައިސާއާއި، މާލުގެ ތަނަވަސްކަން ހޯދުމުގައި އެކަކު އަނެކަކު ވާދަކުރަނީ ވާދައިގެ ހަމައިން ބޭރުގައެވެ. މަކަރާއި ހީލަތް ހެދުމާއި އޮޅުވާލުމާއި ހިޔާނާތުން މުއްސަނދިކަން ލިބިގަތުމަށް މަސައްކަތްކުރެވެއެވެ. އަދި ދުނިޔޭގެ މުއްސަނދިކަން ހޯދައިގަތުމުގައި ތިމާމެންގެ ވާޖިބުތައް ހަނދާންނެތިކޮށްފިއެވެ. ދީނީ އަދި ގައުމީ ވާޖިބުތަކެއް ބޮލުގައި އެޅިފައިވާކަން ހަނދާންނެތިކޮށްފިއެވެ. މައިންބަފައިންނާއި ދަރިންނަށް އަޅާލުމާއި އޯގާތެރިވުމަކީ ހަމައެކަނި އެމީހުނަށް ހަރަދުކުރުން ކަމުގައި ދެކެވިއްޖެއެވެ. ހަމްދަރުދީ ވުމާއި ލޯތްބާއި ކުލުނަކީވެސް ފައިސާ ކަމުގައި ދެކެވިއްޖެއެވެ. ރަހުމާއި ކުލުނުގެ އަތްތައް ތިރިކޮށް އާއިލާއަށް ހޭދަކުރާ ވަގުތު، މުއްސަނދިކަމާއި ބާރު ލިބިގަތުމަށް ހޭދަކުރެވިއްޖެއެވެ. މިއީ ގިނަ ދިވެހިން ތަހުޒީބުވަމުންދާ ގޮތެވެ.

ތަހުޒީބަކީ ފަރަންޖީންގެ ގޮތްތައް ނަކަލު ކުރުން ކަމުގައިދެކި، ދިވެހި މުޖުތަމައުއާ ބީރައްޓެހި ސަގާފަތްތައް ދިވެހިންނަށް ކަމުގޮއްސިއެވެ. ކެއިން ބުއިމާއި، އުނު އޮރިޔާން ނިވާކުރުންވެސް އެމީހުންގެ ގޮތަށް ބަދަލު ކުރެވެނީއެވެ. ގަޔަށްބާރު، ތުނި، ކުރު ހެދުން އެޅުމަކީ ތަހުޒީބުކަމުގައި ދެކެވިއްޖެއެވެ. އަމުދުން ބުރުގާ ނޭޅުމަކީ މާ މޮޅު ތަހުޒީބެއް ކަމަށް ދެކެވި، އެޅިފައި ހުރި ބުރުގާތައްވެސް ބޭލިއްޖެއެވެ. ދިވެހިންގެ އުޅުމާއި ގުޅުންތަކުގައިވެސް ފެންނަނީ ފަރަންޖީ ނަންނަން ކިޔާ ގުޅުންތަކާއި އުޅުންތަކެވެ. މި ކަންތައްތަކަކީ އިސްލާމީ އުސޫލުތަކާއި ނުބައްދަލު، ދިވެހިންގެ އަސްލާއި ފުށުއަރާ އުޅުންތަކާއި ގުޅުންތަކެވެ. އެހެނަސް ދިވެހިންގެ ގިނަބަޔަކު ތަހުޒީބުވެފައި ތިބީ މި ވިސްނުމުގެ ތެރެއިންނެވެ.

ފަރިތަކަމާއި ފަށުއިކަމާއި އެކު އިނގިރޭސިބަހުން ބަސްމޮށެ އުޅުމަކީ ވެސް ތަހުޒީބުކަމަށް ގަބޫލުކުރެވިއްޖެއެވެ. އާދޭހެވެ! މި ތަހުޒީބު ޒަމާނުގައި އިނގިރޭސި ބަހަކީ ކޮންމެހެން އެނގުން ވަރަށްވެސް މުހިންމު ބަހެކެވެ. ނަމަވެސް އިނގިރޭސި ބަހަށް ދޯޅަވެ، ދިވެހި ބަސްތަކާއި ލަފުޒުތައް ހަނދާންނެތޭނަމަ އެއީ އަދި ތަހުޒީބު ވުމެއް ނޫނެވެ. އެހެނަސް ދެބަސް އެއްކޮށް މަސްހުނިކޮށް ވާހަކަދެއްކުމާއި، އިނގިރޭސިން ވާހަކަ ދެއްކުމަކީ ތަހުޒީބުކަމުގައި ގިނަ ދިވެހިން ދެކެއެވެ.

ތަހުޒީބާއި ނާތަހުޒީބުގެ ތަފާތު ދިވެހިން އޮޅުވާލައިފިއެވެ. އަދި ތަހުޒީބުގެ މާނަވެސް އޮޅުވާލައިފިއެވެ. ތަހުޒީބުގެ ނަމުގައި ކުރެވޭ "ހުތުރު" އަމަލުތަކުގެ ސަބަބުން ދިވެހިންގެ އަސްލު އޮޅި ގެއްލިއްޖެއެވެ. ހަގީގީ ދިވެހިންގެ މާނަވެސް އޮޅި ގެއްލިއްޖެއެވެ. މީނޫންގޮތަކަށް ދިވެހިންނަށް ތަހުޒީބު ވެވެން ނެތީތޯއެވެ.؟