އުމުރުން 5 އަހަރުގެ ކުޑަ އަންހެންކުއްޖެއްގެ ބަނޑުން (މައިދާއިން) 1.5 ކިލޯގެ އިސްތަށި ނަގައިފިއެވެ. އިންޑިޔާގެ ޗަންދިގަޅް އަވަށުގައި އުޅޭ މި ކުއްޖާ އަކީ ނަފްސާނީ ބައްޔެއް ހުންނަ ސިކުނޑި ހަމަ ނުޖެހޭ ކުއްޖެކެވެ.
އެކުއްޖާގެ މައިންފަބައިންނާ ހަވާލާދީ ރިޕޯޓުތައް ބުނާގޮތުން އެ ކުއްޖާ އިސްތަށި ކާތާ ގާތްގަނޑަކަށް 2 އަހަރު ވެދާނެ ކަމަށެވެ. އެހެންވެ އެކުއްޖާގެ ބޯވެސް ހުންނާނީ ބާލާފައި ކަމަށް އޭނާގެ ބެލެނިވެރިން ބުނެއެވެ. ނަމަވެސް އޭނާގެ ހާލު ގޯސްވާ ދުވަސްވަރެއްގައި އެހެން މީހުންގެ އިސްތަށިވެސް ބުރިކޮށްގެން އޭނާ ކައި އުޅޭ ކަމަށް އޭނާގެ ބެލެނިވެރިން ބުނެއެވެ. މި ކަމާ އެ މީހުން ކިތަންމެ ދެރަވިޔަސް އެ ކުއްޖާއަށް ދޭނޭ ވަކި އެހެން ފަރުވާއެއް ނެތްކަމަށް ޑަކްޓަރުން ބުނެފައި ވާތީ އެކަމަށް ކެތްކޮށްގެން އެމީހުން ތިބީކަމަށްވެސް އެކުއްޖާގެ ބެލެނިވެރިން ވަނީ ކިޔައިދީފައެވެ.
މިދިޔަ ބުރާސްފަތި ދުވަހު އެ ކުއްޖާ ހޮސްޕިޓަލަށް ގެންދިޔައީ ބަނޑުގައި ރިއްސާތީއެވެ. ޕަންޗުލާގެ ސިވިލް ހޮސްޕިޓަލުން އޭނާ ބެލި ޑަކްޓަރުވަނީ އޭނާގެ ބަނޑުގެ ސްކޭން އެއް ހަދާފައެވެ. އަދި މައިދާގައި ބޯޅައެއް ކަހަލަ އެއްޗެއް އޮތުމުން އޭތި ނެގުމުގެ އޮޕަރޭޝަން ކުރިއަށް ގެންދިޔައެވެ.
އެ ކުއްޖާ އޮޕަރޭޝަން ކުރި ޑޮކްޓަރ ބަދޫ ވިދާޅުވި ގޮތުގައި މި ފަދަ ޑިސްއޯޑާރ އަށް ޓްރިކޯބެޒޯއާ ކިޔައެވެ. މިއީ ނަފްސާނީ އެކި އެކި ބަލިތައް ތަހައްމަލު ކުރާ މީހުންނަށް ދިމައިވާ ކަމެކެވެ. އާންމުންނަށް ވެސް މިކަން ދިމާ ވުމަކީ އެކަށީގެންވާ ކަމެކެވެ.
މިހާރު އެ ކުއްޖާގެ ހާލު ރަނގަޅު ކަމަށާއި އަދި އެ ކުއްޖާ އޮތީ ހޮސްޕިޓަލުގައި ކަމަށް އޭނާގެ އާއިލާއިން މައުލޫމާތު ދެއެވެ. އެކުއްޖާގެ މައިންބަފައިންގެ އެދުމަކީ ކުރިއަށް އޮތްތާވެސް އެކުއްޖާ އެހެން ނޫޅޭނޭ ގޮތެއް ހަދައިދިނުމެވެ. ނަފްސާނީ ޑޮކްޓަރުންގެ ޓީމެއްވެސް ވަނީ މިހާރު އެކުއްޖާއަށް ފަރުވާކުރުމުގައި އަލުން ބައިވެރި ވެފައެވެ.
ނަފްސާނީ ބަލިތައް ހުންނަ ކުދިންގެ ތަފާތު މިޒާޖުތަކާއި ތަފާތު އަމަލުތައް އެކުދިންގެ ކިބައިން ފެނިގެންދެއެވެ. މިފަދަ ކުދިންގެ ބެލެނިވެރިން އެކަންކަމާއި ކަންބޮޑުވާއިރު، ބައެއް ހާލަތްތަކުގައި ދެވޭނޭ ފަރުވާއެއް ނެތި ވެސް ދެއެވެ.