ރަމަޟާން މަހަކީ މުސްލިމުންގެ ގާތުގައި އެންމެ މާތް، އެންމެ ބަރަކާތްތެރި މަހެވެ. މިއީ ހަމައެކަނި ކެއިންބުއިމުން ދުރުހެލިވެގެން ތިބޭ މަހެއް ނޫނެވެ. އޭގެ ބަދަލުގައި މިއީ އިންސާނާގެ ރޫޙާނީ ދިރުމާއި، އަމިއްލަ ނަފްސާމެދު ފުންކޮށް ވިސްނާ، ދިރިއުޅުން އައު ގޮތަކަށް ބައްޓަންކުރުމަށް ލިބޭ ރަނުގެ ފުރުޞަތެކެވެ.
މި މަތިވެރި މަހުގެ މައިގަނޑު މަޤްޞަދަކީ އިންސާނާގެ ނަފްސު ތަޤުވާވެރިކަމުގެ މަތީގައި ތަރުބިއްޔަތު ކުރުމެވެ. މިކަމަށް އިޝާރާތް ކުރައްވައި މާތް ﷲ ކީރިތި ޤުރުއާނުގައި ވަޙީކުރައްވާފައިވެއެވެ. "يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ" (البقرة: 183). މާނައީ: "އޭ އީމާންވެއްޖެ މީސްތަކުންނޭވެ! ތިޔަބައިމީހުންގެ ކުރީގެ މީހުންގެ މައްޗަށް ރޯދަ ފަރުޟުކުރެއްވި ފަދައިން ތިޔަބައިމީހުންގެ މައްޗަށްވެސް ރޯދަ ފަރުޟުކުރައްވައިފިއެވެ. އެއީ ތިޔަބައިމީހުން ތަޤުވާވެރިވުމަށްޓަކައެވެ."
ރަމަޟާން މަހަކީ އަމިއްލަ ނަފްސާމެދު ފުންކޮށް ވިސްނާލުމަށް ލިބޭ ވަގުތެކެވެ. ދުނިޔޭގެ އަވަދިނެތި އުޅުމުގެ ތެރެއިން ނަފްސަށް ލިބިފައިވާ ލޮޅުންތަކާއި، ކުރެވިފައިވާ ކުށްތަކުން ސަލާމަތްވުމަށް މިއީ އެންމެ މުނާސަބު ވަގުތެވެ. އަހަރެމެންގެ ދިރިއުޅުމުގެ މިޞްރާބު ހުރީ ކޮން ދިމާއަކަށްތޯ އާއި، މާތް ﷲ އާ އޮތް ގުޅުން ހުރީ ކިހާ މިންވަރަކަށްތޯ ބަލައި، އެކަންކަން ރަނގަޅު ކުރުމަށް މި މަސް މަގުދައްކައިދެއެވެ.
ހަމައެއާއެކު، މިއީ ރޫހާނީ ހަކަތަ އައުވުމުގެ މަހެކެވެ. ގޯސް އާދަތައް ދޫކޮށްލައި، ހެޔޮ އަމަލުތަކުގެ މަތީގައި ދެމިހުރުމަށް އަޒުމް ކަނޑައަޅާ މަހެކެވެ. މަޝްހޫރު ދީނީ ޢިލްމުވެރިޔާ ޝެއިޙް ނޫމާން ޢަލީ ޚާން މިކަމާ ގުޅޭގޮތުން ވިދާޅުވެފައިވަނީ، "ރަމަޟާން މަހަކީ ހަމައެކަނި އަހަރެމެންގެ ބަނޑަށް ދޭ ބްރޭކެއް ނޫނެވެ. އެއީ އަހަރެމެންގެ ރޫޙާއި ހިތް އަލުން ދިރުވައި، ޤުރުއާނާ އޮންނަ ގުޅުން އައުކޮށްލުމަށް ލިބޭ ފުރުޞަތެކެވެ." މި ބަސްކޮޅުން ދޭހަވަނީ ރަމަޟާން މަހުގެ ސަބަބުން އިންސާނާގެ ދިރިއުޅުމަށް އަންނަންޖެހޭ ހެޔޮ ބަދަލުގެ މުހިންމުކަމެވެ.
ރޫޙާނީ ކުރިއެރުމަކީ ރަމަޟާން މަހުގެ އެންމެ ބޮޑު އެއް ނަތީޖާއެވެ. ރޭއަޅުކަމާއި، ކީރިތި ޤުރުއާން ކިޔެވުމާއި، ޛިކުރުކުރުމުގައި ހޭދަކުރެވޭ ވަގުތުތަކުގެ ސަބަބުން ހިތަށް ބަޔާންކުރަންދަތި ހަމަޖެހުމެއް ލިބިގެންދެއެވެ. މިކަމުގެ ސަބަބުން މުސްލިމް އަޅާގެ އީމާންކަން ވަރުގަދަވެ، ދުނިޔަވީ އެދުންތަކަށްވުރެ އާޚިރަތުގެ ބާއްޖަވެރިކަމަށް އިސްކަންދޭން ދަސްވެއެވެ.
ރަމަޟާން މަހަކީ އަހަރެމެންގެ ނަފްސުތައް އިޞްލާޙުކޮށް، އިލާހީ ނޫރުން ހިތްތައް އަލިކޮށްލުމަށް ލިބޭ މަތިވެރި މޫސުމެކެވެ. މި މަހުގެ ބޭނުން ހެޔޮގޮތުގައި ހިފައިފި ނަމަ، އެއީ މުޅި އަހަރަށް ބޭނުންވާ ރޫޙާނީ ހަކަތަ ފޯރުކޮށްދޭނެ ވަޞީލަތެކެވެ. އުންމީދަކީ މި ބަރަކާތްތެރި މަހުގެ ސަބަބުން އަޅުގަނޑުމެން އެންމެންނަކީ ﷲ އަށް ބިރުވެތިވާ، ސާފު ހިތެއްގެ ވެރި ބަޔަކަށް ވެގެންދިއުމެވެ.
ހަވާލާ: ޝެއިޙް ނޫމާން ޢަލީ ޚާން ގެ ދަރުހަކުން