ރޯދަ ހިފުމަކީ އިންސާނާގެ ހަށިގަނޑުގެ މެޓަބޮލިޒަމް އާއި ފެން ހުންނަ މިންވަރަށް ބޮޑެތި ބަދަލުތަކެއް އަންނަ ކަމެކެވެ. މި ބަދަލުތަކުގެ ސަބަބުން އަނގަ ހިކުމާއި އަނގައިން ނުބައި ވަސް ދުވުން ފަދަ ކަންކަން މެދުވެރިވެއެވެ. ނަމަވެސް، ސިއްހީ ގޮތުން ހޯދިފައިވާ ހޯދުންތަކަށް ބަލައި، ރަނގަޅު އުސޫލުތަކެއް ކަނޑައަޅައިފިނަމަ މިފަދަ މައްސަލަތަކުން ދުރުހެލިވެވިދާނެއެވެ.
ރޯދައަށް ހުންނަ ވަގުތު އަނގަޔާއި ދަތްތަކަށް ބަދަލު އަންނަ މައިގަނޑު ސަބަބަކީ ކުޅު އުފައްދާ މިންވަރު މަދުވުމެވެ. ކުޅަކީ އަނގައިގައި ހުންނަ ކާނާގެ ކުނޑިތައް ސާފުކޮށްދީ، ބެކްޓީރިއާ އިތުރުވުން ކޮންޓްރޯލްކޮށްދޭ ގުދުރަތީ ވަސީލަތެކެވެ. ރޯދައަށް ހުންނައިރު ހަށިގަނޑުން ފެން މަދުވުމުގެ ސަބަބުން ކުޅު މަދުވެ، ބެކްޓީރިއާގެ ހަރަކާތްތައް އިތުރުވެއެވެ. މީގެ އިތުރުން، ހަށިގަނޑުގައި ހަކަތަ އުފެއްދުމަށްޓަކައި ސަރުބީ ވިރުވަން ފެށުމުން އުފެދޭ "ކީޓޯންސް" ގެ ސަބަބުން ނޭވާލާއިރު ތަފާތު ވަހެއް ދުވުމަކީ ވެސް އާންމުކޮށް ދިމާވާ ކަމެކެވެ.
އަނގަޔާއި ދަތްތަކުގެ ދުޅަހެޔޮކަން ދެމެހެއްޓުމަށްޓަކައި ރަނގަޅު އާދަތަކެއް ގެންގުޅުން މުހިންމެވެ. އެގޮތުން، ހާރާއި ރޭގަނޑުގެ ކެއުމަށްފަހު ފްލޮރައިޑް ހުންނަ ދަތްއުނގުޅާ ބޭހަކުން ދަތް އުނގުޅުމާއި، ދޫ ސާފުކުރުމަކީ ނުބައި ވަސް ދުވުން ހުއްޓުވުމަށް އެހީތެރިވެދޭނެ ކަމެކެވެ. އަދި ރޯދަ ވީއްލުމަށްފަހު ހާރާ ދެމެދު ގިނައިން ފެން ބުއިމާއި، ކެފޭއިން ހުންނަ ބުއިންތަކުން ދުރުހެލިވުން މުހިންމެވެ. ކެއުމުގައި ކިއުކަމްބާ، ކަރާ، އަދި އޮރެންޖު ފަދަ ފެން ގިނަ މޭވާ ބޭނުންކުރުމަކީ ހަށިގަނޑު ހައިޑްރޭޓްކޮށް ބެހެއްޓުމަށް މަގުފަހިވާނެ ކަމެކެވެ.
ކާނާ އިޚްތިޔާރު ކުރުމުގައި ވެސް ސަމާލުކަން ދޭންޖެހެއެވެ. ފައިބަރު ގިނަ މޭވާ އާއި ޔޯގަޓް ފަދަ ތަކެތި ބޭނުންކުރުމަކީ އަނގައިގެ ސިއްހަތަށް ފައިދާހުރި ކަމެކެވެ. ނަމަވެސް، ލޮނުމެދާއި ފިޔާ ފަދަ ވަސް ގަދަ ތަކެއްޗާއި، ހަކުރު ގިނަ ފޮނި ތަކެތި ހާރު ގަޑީގައި ބޭނުންކުރުމުން ދުރުހެލިވާންޖެހެއެވެ. އަދި ނޭވާލާއިރު އަނގައިން ނޭވާލުމުގެ ބަދަލުގައި ނޭފަތުން ނޭވާލުމަށް އާދަކުރުމަކީ އަނގަ ހިކުން ކުޑަކޮށްދޭނެ ކަމެކެވެ.
ބްރިޓިޝް ޑެންޓަލް ޖާނަލްގައި 2025 ވަނަ އަހަރު ޝާއިޢުކޮށްފައިވާ "ރަމަދާން ފާސްޓިން އެންޑް އޯރަލް ހެލްތު" މި ދިރާސާގައި ފާހަގަކޮށްފައިވާ ގޮތުގައި، ރޯދައަށް ހުންނަ ވަގުތު އަނގައިގެ ދުޅަހެޔޮކަން ދެމެހެއްޓުމަށްޓަކައި ސައިންޓިފިކް އިރުޝާދުތަކަށް އަމަލުކުރުމަކީ ކޮންމެހެން ބޭނުންތެރި ކަމެކެވެ. މި ދިރާސާއިން ދައްކާގޮތުގައި، ހަށިގަނޑުން ފެންމަދުވުމުގެ ސަބަބުން ދިމާވާ އަނގަ ހިކުމުގެ މައްސަލަ ހައްލުކުރުމަށްޓަކައި، ރޯދަ ނޫން ވަގުތުތަކުގައި އިލެކްޓްރޯލައިޓްސް (ސޯޑިއަމް، ޕޮޓޭސިއަމް އަދި މެގްނީޒިއަމް) އެކުލެވޭ ބުއިންތަކާއި ކާނާ ބޭނުންކުރުމުން ހަށިގަނޑުގައި ފެން ހިފަހައްޓައިދޭ މިންވަރު އިތުރުކޮށްދެއެވެ. މީގެ އިތުރުން، އަލްކަހޯލް ނުހިމެނޭ މައުތުވޮޝް ބޭނުންކުރުމާއި، ކޮންމެހެން ބޭނުންވެއްޖެ ހާލަތެއްގައި "ސަލައިވާ ސަބްސްޓިޓިއުޓް" ޖެލް ފަދަ ތަކެތި ބޭނުންކުރުމަކީ (ރޭގަނޑުގެ ވަގުތުގައި) އަނގަ ތެތްކޮށް ބެހެއްޓުމަށް އެހީތެރިވެދޭނެ ކަމެއްކަމަށް މި ރިޕޯޓުގައި ބަޔާންކޮށްފައިވެއެވެ.
މި ހުރިހާ ކަމަކަށް ސަމާލުކަން ދިނުމުން ވެސް، ދަތްޕިލާއިން ލޭައައުމާއި، ދަތުގައި ރިއްސުން ނުވަތަ އާދަޔާ ހިލާފަށް އަނގައިން ނުބައި ވަސް ދުވާނަމަ، ލަސްނުކޮށް ދަތުގެ ޑޮކްޓަރެއްގެ ލަފާ ހޯދަންވާނެއެވެ. ރޯދަ މަހަކީ އަޅުކަމުގެ މަހަކަށް ވާއިރު، އަމިއްލަ ސިއްހަތަށް ރައްކާތެރިވުމަކީ އަޅުކަންތައް ފުރިހަމައަށް އަދާކުރުމަށް ލިބޭ ބޮޑު ބާރެކެވެ.
ހަވާލާ: ބްރިޓިޝް ޑެންޓަލް ޖާނަލް (2025).