އަމިއްލަ ސާފުތާހިރުކަމާއި ރީތިވުމަށް ބޭނުންކުރާ ސާމާނަކީ ކޮންމެހެން މުހިންމު އެއްޗެއް ނަމަވެސް، އެ ތަކެތި މާ ގިނަ ދުވަހު ބޭނުންކުރުމަކީ ބެކްޓީރިއާ އުފެދުމަށް މަގުފަހިވާ ކަމެއް ކަމަށް ހަމުގެ ބަލިތަކާބެހޭ މާހިރުން އިންޒާރު ދެއްވައިފިއެވެ. ހަމުގެ ސިއްހަތު ރައްކާތެރިކުރުމަށާއި އިންފެކްޝަންތަކުން ސަލާމަތްވުމަށްޓަކައި، ކަނޑައެޅިފައިވާ ވަކި މުއްދަތެއްގައި މިފަދަ ތަކެތި ބަދަލުކުރުމަށް މާހިރުން އިރުޝާދުދެއްވައެވެ. މިސާލަކަށް، ދަތް އުނގުޅާ ބުރުސް ކޮންމެ ތިން މަހަކުން ބަދަލުކުރަންޖެހޭއިރު، ބާވެފައިވާ ބުރުހަކުން ދަތްތައް ރަނގަޅަށް ސާފުނުކުރެވުމުގެ އިތުރުން، އޭގައި ބެކްޓީރިއާ އަށަގަންނަ ކަމަށް ސިއްހީ ރިޕޯޓުތަކުން ދައްކައެވެ.
ހަމައެފަދައިން، ތުނބުޅި ބާލާ ރޭޒަރާއި އިލެކްޓްރިކް ޝޭވަރުތަކުގެ މިޔަވެސް ދުވަސްވުމުން ބަދަލުކުރަންޖެހެއެވެ. އެއްފަހަރު ބޭނުންކޮށްފައި އުކާލާ ރޭޒަރު 5-10 ފަހަރު ބޭނުންކުރުމަށްފަހު ބަދަލުކުރަންޖެހޭއިރު، މިޔަ ކަނޑުވުމުގެ ސަބަބުން ހަންގަނޑު ކަހާ ގޮތްވުމާއި އެހެނިހެން މައްސަލަތައް ދިމާވެއެވެ. މީގެ އިތުރުން މޭކަޕް ކުރަން ބޭނުންކުރާ ބުރުސްތަކާއި ސްޕޮންޖް ފަދަ ތަކެތިވެސް ގަވާއިދުން ސާފުކޮށް ނުވަތަ ބަދަލުކުރަން ޖެހެއެވެ. ސްޕޮންޖް ފަދަ ތަކެތީގައި ބެކްޓީރިއާ އަށަގަތުމުގެ ސަބަބުން މޫނުގައި ބިހި ނެގުން ފަދަ ކަންކަން ދިމާވާތީ ކޮންމެ 1-3 މަހަކުން އެފަދަ ތަކެތި ބަދަލުކުރުމަށް ހެލްތުލައިން ފަދަ އިދާރާތަކުން ލަފާދެއެވެ.
އަމިއްލަ ސާފުތާހިރުކަމަށް ބޭނުންކުރާ އާލާތްތައް ގަވާއިދުން ބެލެހެއްޓުމާއި، އޭގެ މިޔަ ބަދަލުކުރުމަކީ ސާފުތާހިރުކަން ދެމެހެއްޓުމަށާއި ހަންގަނޑަށް ދިމާވެދާނެ އިންފެކްޝަންތަކުން ދުރުކޮށްދޭނެ ކަމެކެވެ. އިސްތަށި ކޮށާ މެޝިން ފަދަ ތަކެތީގެ މިޔަ ބަދަލުކުރުމަކީ މެޝިންގެ މަސައްކަތް ފުރިހަމަކުރުމަށްވެސް ބޭނުންތެރި ކަމެކެވެ. މިފަދަ ތަކެތި ބަދަލުކުރުމަށް ކަނޑައެޅިފައިވާ ތާވަލަށް އަމަލުކުރުމުން، ހަމުގެ ސިއްހަތު ރައްކާތެރިވެ، ރީތިވުމަށް ކުރާ މަސައްކަތުގެ ފުރިހަމަ ނަތީޖާ ލިބިގެންދާނެއެވެ.