އިންސާނާގެ ނޭފަތުގެ ވާހަކަ ބުނުމުން އެންމެނަށްވެސް އެނގޭނެ ކަމަކީ ނޭވާލުމާއި ވަސްބެލުމުގެ ވާހަކަ. އެހެނަސް ނޭފަތަކީ ވަރަށް މުހިންމު އެހެން ދެ ދައުރެއްވެސް އަދާ ކުރާ ގުނަވަނެއް.

ނޭފަތް ނުވާނަމަ ރަހަލުމެއްވެސް ނެތީހޭ. އެހެނީ ރަހަ ދެނެގަންނަ ސެލްތަކަކީ އެހެން ހިއްސުތަކާއި މަސްހުނިވެގެން މަސައްކަތް ކުރާ ސެލްތަކެއް. އެގޮތުން ރަހަ ދެނެގަތުމުގެ ސެލްތަކަށް އެހީވާ އެންމެ މުހިންމު އެއް ހިއްސަކީ ވަސްދުވުމުގެ ހިއްސު. ވަސްދުމުގެ ހިއްސު ފުރިހަމައަށް މަސައްކަތް ނުކުރާނަމަ ނުވަތަ ވަސް ނުދުވާނަމަ ރަހައެއް ނުލާނެ. އެކަން އެންމެ ފަސޭހައިން އިނގޭނީ ރޯގާ ޖެހި ނޭފަތް ބެދޭ ހިސާބުން. ރޯގާ ޖެހި ނޭފަތުން ވައި ނުހިނގުމުން ވަސް ދުވުމުގެ ހިއްސަށް ބުރޫއަރާ. އެހިސާބުން ރަހަ ދެނެގަތުމުގެ ހިއްސު ފުރިހަމަ ނުވޭ. މާނައަކީ ރަހައެއް ނުލާނޭ.

މީގެ އިތުރުން ނޭފަތުން ކޮށްދޭ އަނެއް މުހިންމު ކަމަކީ އިންސާނާގެ ބޮލުގެ ތެރޭގެ ޕުރެސަފު ހިފަހައްޓައި ދިނުމަށް އެހީވުން. ނޭފަތާއި ކަންފަތާއި ގުޅުވައިދޭ ކުޑަ ހޮޅިއެއް ވޭ. އެ ހޮޅިއަށް ކިޔަނީ "އީސްޓެޝިއަށް ޓިއުބް". މި ހޮޅި އަކީ ވައިގެ ޕުރެސަރު ކޮންޓްރޯލް ކުރުމަށް އެހީވެދޭ ހޮޅިއެއް. އަޑިއަށް ފީނާ މީހުންނާއި މަތިންދާ ބޯޓުތަކުގައި ދަތުރުކުރާ މީހުންނަށް މިކަން އިހުސާސް ވާލެއް ފަސޭހަ ވާނެ. އަދި ހިން ދިރުވާލާ ކޮންމެ ފަހަރަކު ވެސް މި ހޮޅީގެ ޕުރެސަރަކަށް ޒާތެއްގެ ބަދަލެއް އާދޭ.

ހަމަ އެއާއި އެކު މި ޕުރެސަރު ކޮންޓްރޯލް ކުރުމަކީ އަޑުއިވުމަށް ވެސް މަގުފަހިކޮށްދޭނޭ ކަމެއް. އެހެނީ ބޮލާ ކަންފަތުގެ އެތެރޭގެ ވައިގެ ޕުރެސަރާ މާހައުލުގެ ވައިގެ ޕުރެސަރު ހަމަ ހަމަ ނުވާނަމަ އަޑެއް ނީވޭނެ. ނޭފަތާއި ގުޅިފައިވާ މި ހޮޅިން، ނޭފަތުގެ އެހީގައި މާހައުލުގެ ވައިގެ ޕުރެސަރާއި އެއްވަރަށް ބޮލާ ކަންފަތުގެ ވައިގެ ޕުރެސަރު ހަމަ ހަމަ ކޮށްދޭ. މި ޕުރެސަރު ހަމަ ހަމަ ނުވާނަމަ ބޮލުގާ ރިހޭނެ. ރޯގާ ޖެހި ނޭފަތް ބެދި، މި ހޮޅީގެ މަސައްކަތަށް ބުރުއެރުމުން ނުވަތަ މި ހޮޅި ބަންދުވުމުން ނިތްކުރިއާއި އެކު ބޮލުގައި ރިހޭނެ. އަދި ބޯ ތިރިކުރުމުން ނުވަތަ ގުދުވުމުން ބޮލުގެ ރިހުން އިތުރަށް ގަދަވާނެ. މިއީ ޕުރެސަރު ހަމަ ހަމަ ނުކުރެވުމުން ވާ ކަންކަން.

ނޭފަތަކީ އިންސާނާގެ ސިފަ ރީތިކޮށްދިނުމުގެ އިތުރަށް އިސްވެ ބުނެވުނު ހުރިހާ ކަމަށް އެހީވެދޭ ގުނަވަނެއް. ނޭފަތަކީ އޭގެ ޒިންމާ އިންތިހާއަށްބޮޑު ގުނަވަނެއް. މި ފުރިހަމަ ނިޒާމު އިންސާނާގެ ހަށިގަނޑުގައި ލައްވާ ތަރުތީބު ކުރެއްވި އިލާހަށް ހަމްދާއި ޝުކުރުހުރި!