އިންސާނާގެ މި ދުނިޔަވީ ޙަޔާތަކީ ތަފާތު އިމްތިޙާނުތަކާއި ކުރިމަތިލުންތަކުން ފުރިގެންވާ ދަތުރެކެވެ. ބައެއް ފަހަރު ކުރިމަތިވާ ހިތްދަތި ކަންކަމާއި، ނާކާމިޔާބީތަކުގެ ސަބަބުން ހިތްވަރު އެލި، މާޔޫސްކަމުގެ ފުން ކަނޑަކަށް އިންސާނާ ޣަރަޤުވެގެންދެއެވެ. ނަމަވެސް، މުއުމިނެއްގެ ސިފައަކީ ކޮންމެފަދަ ޙާލަތެއް ކުރިމަތިވި ކަމުގައިވިޔަސް، މާތް ﷲ ގެ ރަޙްމަތުން އުއްމީދު ކަނޑާނުލުމެވެ. އިސްލާމްދީނަކީ އިންސާނާއަށް ހިތްވަރާއި ސާބިތުކަން ދަސްކޮށްދޭ ދީނެކެވެ.
ކީރިތި ޤުރުއާނުގެ އާޔަތްތަކަށް ބަލާއިރު، މުއުމިނުންނަށް ދެއްވާފައިވާ އެންމެ ބޮޑު އެއް ހިތްހަމަޖެހުމަކީ، މާތް ﷲ އެކަލާނގެ އަޅުތަކުންނަށް ދެއްވާ ނަޞްރާއި މަތިވެރިކަމުގެ އުފާވެރި ޚަބަރެވެ. މިކަމާ ގުޅޭގޮތުން އާލުޢިމްރާން ސޫރަތުގެ 139 ވަނަ އާޔަތުގައި މާތް ﷲ ވަޙީކުރައްވާފައިވެއެވެ.
"وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ"
މާނައީ: "ތިޔަބައިމީހުން (ދީނުގެ މަގުގައި ކުރިމަތިވާ ކަންކަމުގައި) ހިތްވަރު އެލުވައިނުލާށެވެ! އަދި ތިޔަބައިމީހުން (ކުރިމަތިވާ މުޞީބާތްތަކަށް)، ދެރަނުވާށެވެ! ތިޔަބައިމީހުންނީ މުއުމިނުން ކަމުގައިވާނަމަ، މަތިވެރިކަން ލިބިގެންވަނީ ތިޔަބައިމީހުންނަށެވެ."
މި އާޔަތުން އެނގިގެންދަނީ މުއުމިނަކަށްވީތީ ލިބޭ އެންމެ ބޮޑު ޝަރަފަކީ، ކޮންމެފަދަ ދަތި ޙާލަތެއްގައިވެސް މަތިވެރިކަން އޮތީ އޭނާއަށް ކަމެވެ. ދުނިޔަވީ ގޮތުން ބަލާއިރު ބައެއް ފަހަރު ބަލިވުމެއް ނުވަތަ ދެރަގޮތެއް މެދުވެރިވި ކަމުގައި ހީވިޔަސް، އީމާންކަމުގެ މަތީގައި ސާބިތުވެ ހުރި މީހާއަށް އާޚިރަތުގެ ކާމިޔާބީއާއި ދުނިޔޭގެ ޢިއްޒަތް ލިބިގެންވެއެވެ. ހިތްވަރު އެލުވާލުމަކީ މުއުމިނެއްގެ ސިފައެއް ނޫނެވެ. ސަބަބަކީ މުއުމިނާގެ ފަހަތުގައިވަނީ ކާއިނާތުގެ ވެރި އިލާހުގެ އެހީތެރިކަމާއި ނަޞްރު ކަމަށްވާތީއެވެ.
މީގެ އިތުރުން، މާތް ﷲ ގެ އެހީތެރިކަން ލިބުމުން އެއްވެސް ފަރާތަކަށް މުއުމިނުންގެ މައްޗަށް ކުރިނުހޯދޭނެކަން ކީރިތި ޤުރުއާނުގައި ބަޔާންކުރައްވާފައިވެއެވެ. އާލުޢިމްރާން ސޫރަތުގެ 160 ވަނަ އާޔަތުގައި ވަޙީކުރައްވާފައިވެއެވެ.
"إِنْ يَنْصُرْكُمُ اللَّهُ فَلَا غَالِبَ لَكُمْ ۖ وَإِنْ يَخْذُلْكُمْ فَمَنْ ذَا الَّذީ يَنْصُرُكُمْ مِنْ بَعْدِهِ ۗ وَعَلَى اللَّهِ فَلْيَتَوَكَّلِ الْمُؤْمِنُونَ"
މާނައީ: "ﷲ ތިޔަބައިމީހުންނަށް ނަޞްރުދެއްވާނަމަ، ދެން ތިޔަބައިމީހުންގެ ބަލިކުރާނޭ އެއްވެސް ފަރާތެއް ނުވެއެވެ. އަދި އެކަލާނގެ ތިޔަބައިމީހުން ނިކަމެތިކޮށްލައްވައިފިނަމަ (އެބަހީ: ނަޞްރު ނުދެއްވައި ދޫކޮށްލައްވައިފިނަމަ) އެކަލާނގެއަށްފަހު، ތިޔަބައިމީހުންނަށް ނަޞްރުދޭނީ ފަހެ، ކާކުހެއްޔެވެ؟ މުއުމިނުން ހަމައެކަނި ﷲ އަށް ވަކީލުކުރާހުށިކަމެވެ!"
ވީމާ، މުސްލިމުންގެ ގޮތުގައި ތިބޭއިރު އަޅުގަނޑުމެންގެ ހިތްތަކުގައި ބަހައްޓަންޖެހޭ އެންމެ ވަރުގަދަ އަސާސަކީ، މާތް ﷲ އަށް އޮންނަ އިތުބާރާއި ވަކީލުކުރުމެވެ. ދިރިއުޅުމުގައި ކުރިމަތިވާ ކޮންމެ ހުރަހަކީ އިމްތިޙާނެއްކަން ދަނެ، އީމާންކަން ވަރުގަދަކުރަންޖެހެއެވެ. މާޔޫސްކަމާއި ހިތްދަތިކަމަކީ އީމާންކަން ބަލިކަށިކޮށްލާ ކަންކަމެވެ. ނަމަވެސް ﷲ ގެ އާޔަތްތަކުން ހިތްވަރު ލިބިގަނެ، ހަޤީޤީ މުއުމިނުންގެ ގޮތުގައި ސާބިތުވެ ތިބެއްޖެނަމަ، ދުނިޔެއާއި އާޚިރަތުގެ މަތިވެރިކަން އަޅުގަނޑުމެންނަށް ކަށަވަރުވެގެންދާނެއެވެ.