ސައުދީ އަރަބިއްޔާގެ އިރުދެކުނުގައި އޮންނަ ޝައިބާ ތެޔޮ ދަނޑަށް އަމާޒުކޮށް ދޭން އުޅުނު ހަތް ޑްރޯން ހަމަލާއެއް ސައުދީ ސިފައިން މިއަދު ހުއްޓުވައިފިއެވެ.
ސައުދީ ޑިފެންސް މިނިސްޓްރީން ބުނީ، ޔޫއޭއީ ބޯޑަރު ކައިރީގައި އޮންނަ މި މުހިންމު ތެޔޮ ވަސީލަތަށް އަމާޒުކުރި ދެ ޑްރޯން "އެމްޕްޓީ ކުއާޓާ" ސަރަހައްދުން ވައްޓާލާފައިވާ ކަމަށެވެ. އަދި އެކި ސަރަހައްދުތަކަށް ދޭން އުޅުނު އިތުރު ފަސް ޑްރޯން ހަމަލާއެއްވެސް ވަނީ ނާކާމިޔާބު ކޮށްލާފައެވެ.
މި ހަމަލާތަކަކީ ފެބުރުއަރީ މަހުގެ ފަހުކޮޅުން ފެށިގެން އެމެރިކާ އާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައިގެ ތެރެއިން އައި ހަމަލާތަކެކެވެ. ޑިފެންސް މިނިސްޓްރީގެ ތަރުޖަމާނު މޭޖަރ ޖެނެރަލް ތުރްކީ އަލް މާލިކީ ވިދާޅުވީ، ސައުދީގެ ވައިގެ ދިފާއީ ނިޒާމުތައް އޮތީ ވަރަށް ވަރުގަދަ އެލާޓެއްގައި ކަމަށާއި، މި ހަމަލާތަކުގެ ސަބަބުން އެއްވެސް މީހަކަށް ގެއްލުމެއް ނުލިބޭ ކަމަށެވެ. އަދި ތެޔޮ އުފެއްދުމުގެ މަސައްކަތަށް އެއްވެސް މެދުކެނޑުމެއް އައިސްފައި ނުވާކަމަށްވެސް އޮފީހުން ބުންޏެވެ.
ޝައިބާ ތެޔޮ ދަނޑަކީ ދުނިޔޭގެ ތެޔޮ ބާޒާރަށް ދުވާލަކު އެއް މިލިއަން ފީފާ ތެޔޮ ސަޕްލައިކުރާ ވަރަށް މުހިންމު ތަނެކެވެ. މިދިޔަ ހަފުތާއެއްހާ ދުވަހުގެ ތެރޭގައި އެ ސަރަހައްދަށް އަމާޒުކޮށް ގިނަ އަދަދެއްގެ ޑްރޯން އަދި މިސައިލް ހަމަލާތައް ވަނީ ފޮނުވާލާފައެވެ. މި ހަމަލާތަކާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލިދާނެ ކަމުގެ ބިރު ވަނީ ބޮޑުވެފައެވެ. ސައުދީގެ އިތުރުން ބަހުރޭނާއި ޔޫއޭއީންވެސް ވަނީ އީރާނުން ފޮނުވާލި ހަމަލާތަކެއް ހުއްޓުވާފައިވާ ކަމަށެވެ.