މާބަނޑު ދުވަސްވަރަކީ އަންހެނެއްގެ ހަށިގަނޑަށް ޖިސްމާނީ ގޮތުންނާއި ނަފްސާނީ ގޮތުން ބޮޑެތި ބަދަލުތަކެއް އަންނަ، އަދި ރޫހާނީ ގޮތުން ގޮންޖެހުންތަކެއް ކުރިމަތިވާ ދުވަސްވަރެކެވެ. ރަމަޟާން މަސް ފަދަ ބަރަކާތްތެރި ދުވަސްވަރަކާ ބައްދަލުވާއިރު، ގިނަ މާބަނޑު އަންހެނުން ރޯދަ ހިފުމާ މެދު ވިސްނުންތަކެއް ގެންގުޅެއެވެ. މި ހާލަތުގައި، މެޑިކަލް ސައިންސާއި އިސްލާމީ ފިޤުހުވެސް އެއްބަސްވަނީ މައިމީހާއާއި ދަރިފުޅުގެ ދުޅަހެޔޮކަމަށް އެންމެ އިސްކަންދޭން ޖެހޭނެ ކަމަށެވެ. އެހެންކަމުން، ސިއްހީ ހޯދުންތަކާއި ދީނީ އިރުޝާދުތަކުގެ އަލީގައި މިކަމާ މެދު ހޭލުންތެރިވުމަކީ ބުއްދިވެރި ނިންމުމެއް ނިންމުމަށް އެހީތެރިވެދޭނެ ކަމެކެވެ.
ސިއްހީ ނަޒަރަކުން ބަލާއިރު، މާބަނޑު ދުވަސްވަރަކީ ހަށިގަނޑުގެ މެޓަބޮލިޒަމްގެ ބޭނުންތައް އިތުރުވާ ވަގުތެކެވެ. ބަނޑުގައިވާ ދަރިފުޅުގެ ހެދިބޮޑުވުމަށާއި، މަހުގެ މަސައްކަތަށާއި، މައިމީހާގެ ދުޅަހެޔޮކަމަށްޓަކައި ހަށިގަނޑަށް މެދުނުކެނޑި ފައިދާހުރި ކާނާއާއި، ފެނާއި، ހަކަތަ ބޭނުންވެއެވެ. ދިރާސާތަކުން ދައްކާގޮތުގައި، ގިނަ ވަގުތު ރޯދައަށް ހުރުމަކީ ހަށިގަނޑުން ފެން މަދުވުމާއި، ވަރުބަލިވުމާއި، އަދި ލޭގައި ހަކުރު ހުންނަ މިންވަރު އެއްވަރެއްގައި ހިފެހެއްޓުމަށް ދަތިވާ ކަމެކެވެ. ޚާއްޞަކޮށް މާބަނޑު ދުވަސްވަރު ހަކުރު ބަލި ހުންނަ މީހުންނާއި، ލޭމަދު މީހުންނަށް މީގެ ނުރައްކާ ބޮޑެވެ. ދާދި ފަހުން 1.3 މިލިއަނަށްވުރެ ގިނަ މާބަނޑު މީހުން ބައިވެރިކޮށްގެން ހެދި ދިރާސާއަކުން ދައްކާގޮތުގައި، ރޯދަ ހިފުމުގެ ސަބަބުން ތުއްތު ކުއްޖާގެ ބަރުދަން ކުޑަކޮށް ލުއިވުމުގެ ފުރުސަތު އޮވެއެވެ. އެ ދިރާސާގެ މުސައްނިފުން ބުނެފައިވަނީ، "މާބަނޑު ދުވަސްވަރު ރޯދަ ހިފުމަކީ އުފަންވާ ކުއްޖާގެ ބަރުދަން ކުޑަކޮށް ލުއިވުމާ ގުޅުންހުރި ކަމެކެވެ. ނަމަވެސް މި ބަދަލަކީ ވަރަށް ކުޑަ އަދި ސިއްހީ ގޮތުން މާބޮޑު ނުރައްކަލެއް އޮތް ކަމެއް ނޫނެވެ." މީގެއިން އެނގެނީ ސިއްހަތު ރަނގަޅު މީހުންނަށް މިއީ ބޮޑު ނުރައްކަލަކަށް ނުވި ނަމަވެސް، ހަށިގަނޑަށް އިތުރު ބުރައެއް އުފުލަން ޖެހޭ ކަމެވެ.
މީގެ އިތުރުން، ފެން ނުބޮއި ގިނަ ވަގުތު ހުރުމުގެ ސަބަބުން ބޮލުގައި ރިއްސުމާއި، ބޯއެނބުރުން ފަދަ އުނދަގޫތައް ކުރިމަތިވެދާނެއެވެ. ފެން މަދުވުމަކީ މާބަނޑު މީހުންނަށް އާންމުކޮށް ދިމާވާ ކުޑަކަމުދާ ނިޒާމުގެ ބަލިތައް ޖެހުމަށް މަގުފަހިވާ ކަމެކެވެ. ސިއްހީ މާހިރުން ފާހަގަކުރާ ގޮތުގައި، މާބަނޑު ދުވަސްވަރުގެ ފުރަތަމަ ތިން މަހުގައި މޭނުބައިކުރުމާއި ހޮޑުލުން ކުރިމަތިވާއިރު، އަދި ފަހު ތިން މަހުގައި ކުއްޖާ ބޮޑުވަމުން އަންނަ ވަގުތު ގިނަ ކެލޮރީ ބޭނުންވާއިރު، ރޯދަ ހިފުމަކީ އުނދަގޫ ކަމަކަށް ވެދާނެއެވެ. ނަމަވެސް ކޮންމެ މީހެއްގެ ހާލަތު ތަފާތުވާނެތީ، ޑޮކްޓަރެއްގެ ލަފާ ހޯދުމަކީ ކޮންމެހެން ކުރަންޖެހޭ ކަމެކެވެ.
އިސްލާމީ ފިޤުހުވެސް މިކަމުގައި ސިއްހީ ކަންބޮޑުވުންތަކަށް ވަރަށް ބޮޑަށް ރިއާޔަތްކުރެއެވެ. އިސްލާމީ ޝަރީއަތުގައި، މާބަނޑު އަންހެނާއަށް ނުވަތަ ބަނޑުގައިވާ ދަރިފުޅަށް ގެއްލުމެއް ވެދާނެކަމުގެ ބިރު އޮތްނަމަ ރޯދަ ދޫކޮށްލުމުގެ ހުއްދަ ޞަރީޙަކޮށް ދެއްވާފައިވެއެވެ. މި ހުކުމް ބިނާވެގެންވަނީ " މާތް ﷲ އެއްވެސް ނަފްސަކަށް އެ ނަފްސަކަށް ކުޅަދާނަވެގެންވާ މިންވަރަށް މެނުވީ ތަކުލީފެއް ނުޖައްސަވައެވެ" މި ޤުރުއާނީ އަޞްލުގެ މައްޗަށެވެ. އަދި ގެއްލުން ހުއްޓުވުމަކީ މަންފާ ހޯދުމަށްވުރެ އިސްކަންދޭންޖެހޭ ކަމެއް ކަމަށް އޮންނަ ފިޤުހީ ޤާއިދާގެ މައްޗަށެވެ. ދީނީ އިލްމުވެރިން އެއްބަސްވެލައްވާ ގޮތުގައި، ރޯދަ ހިފުމުގެ ސަބަބުން ހަށިގަނޑު ބަލިކަށިވެ، ދަރިފުޅަށް ނުރައްކާވާނަމަ ރޯދަ ދޫކޮށްލުމަކީ ހުއްދަ ކަމެއްގެ އިތުރުން އެދެވިގެންވާ ކަމެކެވެ. މިގޮތަށް ދޫކޮށްލާ ރޯދަ ފަހުން ޤަޟާކުރުން ނުވަތަ ބައެއް ހާލަތްތަކުގައި ފިދުޔަ ދިނުމުން ފުދޭނެއެވެ.
މިފަދަ ލުއިތަކެއް އޮތް ނަމަވެސް، ބައެއް އަންހެނުން ދީނީ ލޯތްބެއްގެ ބޮޑުކަމުން ރޯދަ ހިފަން ބޭނުންވެއެވެ. އެފަދަ މީހުންނަށް އޮތް ނަސޭހަތަކީ ހަށިގަނޑަށް ބަލައިގެން، ލުއި ގޮތްތައް އިޚްތިޔާރު ކުރުމެވެ. މިސާލަކަށް އެއް ދުވަސް ދޫކޮށް އަނެއް ދުވަހު ރޯދަ ހިފުމާއި، ބަލިކަށިކަމެއް އިހުސާސްވާއިރަށް ރޯދަ ދޫކޮށްލުމެވެ. އަދި ރޯދަ ވީީއްލާ ވަގުތުން ފެށިގެން ހާރުވަގުތާ ހަމައަށް ގިނައިން ފެން ބުއިމަށާއި، ފައިދާހުރި ކާނާ ކެއުމަށް ސަމާލުކަން ދޭންވާނެއެވެ. އިލްމުވެރިން ފާހަގަކުރައްވާ ގޮތުގައި، މާތް ﷲ ދެއްވާފައިވާ ލުއި ޤަބޫލުކުރުމަކީވެސް ކިޔަމަންތެރިކަމުގެ އަމަލެކެވެ. ސިއްހަތަށްޓަކައި ރޯދަ ދޫކޮށްލުމަކީ ރޫހާނީ ގޮތުން ދަށަށް ދިއުމެއް ނޫނެވެ.
ނިންމާލަމުން ބުނެވޭނީ، މާބަނޑު ދުވަސްވަރު ރޯދަ ހިފުމުގެ ނިންމުމަކީ ސިއްހީ ހާލަތާއި، ދީނީ ލުއިތަކާއި، އަމިއްލަ ކުޅަދާނަކަމަށް ބަލައިގެން ނިންމަންޖެހޭ ވަރަށް އަމިއްލަ ނިންމުމެކެވެ. ސިއްހީ ދިރާސާތަކާއި ދީނީ ފިޤުހުވެސް ބާރުއަޅަނީ އެއް އަސާސެއްގެ މައްޗަށެވެ. އެއީ މައިމީހާއާއި ދަރިފުޅުގެ ސިއްހަތަކީ އެންމެ އިސްކަންދޭންޖެހޭ ކަންތައް ކަމެވެ. މާބަނޑު އަންހެނުން ޑޮކްޓަރުންގެ އިރުޝާދާއި އިލްމުވެރިންގެ ލަފާ ހޯދައި، އަމިއްލަ ހަށިގަނޑަށް އިހުތިރާމް ކުރުމަކީ ދީނުގެ ރޫހާ އެއްގޮތަށް އަމަލުކުރުމެވެ. އިސްލާމްދީނުގެ މަރުކަޒަކީ އޯގާތެރިކަމެވެ. އުނދަގުލާއި ތަކުލީފެއް ނޫނެވެ.
ހަވާލާ: ދަ ޕްރެގްނެންސީ އެންޑް ޗައިލްޑް ޗެރިޓީ (2025).