ރޯދަ މަހުގެ ފަހު ދިހައެއްގައި މަސްވެރިކަން ދަށްވެ، ކަނޑުމަހުގެ އަގު އުފުލިއްޖެއެވެ.
މިހާރު ބާޒާރުގައި ކަނޑުމަސް ކިލޯއެއްގެ އަގު ހުރީ 35 ރުފިޔާއާއި 50 ރުފިޔާއާ ދެމެދުގައެވެ. މިއީ ރޯދަ މަހުގެ ކުރީކޮޅު 25 ރުފިޔާއާއި 35 ރުފިޔާއާ ދެމެދުގެ އަގުތަކެއްގައި ލިބުނު މަހެކެވެ. މީގެ އިތުރުން ކަންނެލި ކިލޯއެއްގެ އަގު ވެސް ވަނީ 50 ރުފިޔާއިން މައްޗަށް އުފުލިފައެވެ. މަސްވެރިން ބުނާ ގޮތުގައި އަގު ބޮޑުވާން ދިމާވި މައިގަނޑު ސަބަބަކީ އެންވެރިކަން ދަށްވުމާއި، ފަހު ދިހައެއްގައި މަހަށް ފުރާ ދޯނިތައް މަދުވުމެވެ.
ދައުލަތުގެ މީޑިއާ މެދުވެރިކުރައްވައި މިކަން ހާމަކުރައްވަމުން މަސް މާރުކޭޓުގައި ހަރަކާތްތެރިވާ މަސް ވިއްކާ ފަރާތެއް ބުނީ، ރޯދަ މަހުގެ ކުރީކޮޅު މަސް ތިޔާގިވުމުން އަގުތައް ހުރީ ވަރަށް ހެޔޮކޮށް ކަމަށެވެ. ނަމަވެސް މިހާރު މަސް ލިބުން ދަތިވެ، ދުރު ސަރަހައްދުތަކުން މަސް ގަންނަން ޖެހުމަކީ ވެސް އަގު އުފުލެން ދިމާވި ސަބަބެއް ކަމަށް އޭނާ ފާހަގަކުރިއެވެ.
ކަނޑުމަހުގެ އަގު އުފުލުނު ނަމަވެސް، ބައެއް ފަރުމަހުގެ ބާވަތްތަކުގެ އަގު ވަނީ ރޯދަ މަހުގެ ކުރީކޮޅާ އަޅާބަލާއިރު ދަށްވެފައެވެ. އެގޮތުން ކުރިން 100 ރުފިޔާއަށް ލިބުނު ފިލޮޅު މިހާރު 30 ރުފިޔާއަށް ލިބެން ހުރިއިރު، ތޮޅި ކިލޯއެއް ވިއްކަނީ 20 ރުފިޔާއަށެވެ. އަދި ހަނދީގެ ބާވަތްތައް ވެސް 50 ރުފިޔާއާއި 100 ރުފިޔާއާ ދެމެދުގެ އަގުތަކެއްގައި ބާޒާރުން ލިބެން އެބަހުއްޓެވެ.