ދަރިންނަކީ މާތް ﷲ އިންސާނުންނަށް ދެއްވާފައިވާ އެންމެ އަގުބޮޑު ނިޢުމަތެވެ. އަދި އެއީ މައިންބަފައިންނާ ހަވާލުކުރެވިފައިވާ ވަރަށް ބޮޑު އަމާނާތެކެވެ. މި އަމާނާތް ރައްކާތެރިކަމާއެކު ބަލަހައްޓައި، ހެޔޮލަފާ ޖީލެއް ބިނާކުރުމަކީ ހަމައެކަނި ދުވަސްކޮޅަކުން ނިންމާލެވޭނެ މަސައްކަތެއް ނޫނެވެ. އެއީ ދިިރިއުޅުމުގެ ކޮންމެ ހިނދުކޮޅެއްގައި ކުރަންޖެހޭ، ނިމުމެއް ނެތް ވަރުގަދަ ހަނގުރާމައެކެވެ.
ދަރިން ތަރުބިއްޔަތު ކުރުމުގެ އެންމެ އިސް ޒިންމާއަކީ މައިންބަފައިންގެ ކޮނޑުގައި އެޅިފައިވާ ވާޖިބެކެވެ. ކުއްޖާގެ ދިރިއުޅުމުގެ ބިންގާ އެޅެނީ ގޭތެރެއިންނެވެ. މައިންބަފައިންނަކީ ކުއްޖާގެ ފުރަތަމަ މުދައްރިސުންނެވެ. ނަމަވެސް، މިއަދުގެ މުޖުތަމައަށް ބަލާއިރު، ގިނަ މައިންބަފައިންނަށް ހީވެފައި އޮންނަނީ ދަރިން ތަރުބިއްޔަތު ކުރުމަކީ ހަމައެކަނި ސްކޫލްތަކުގެ ޒިންމާއެއް ކަމަށެވެ. ސްކޫލަކީ ދަރިވަރުންނަށް އިލްމު އުނގަންނައިދީ، އަޚުލާގީ ބައެއް ސިފަތައް ދަސްކޮށްދޭ ތަނަކަށް ވިޔަސް، ކުއްޖާގެ އަސްލު ތަރުބިއްޔަތު ފުރިހަމަވާނީ މައިންބަފައިންގެ ސީދާ ބެލުމުގެ ދަށުންނެވެ. ސްކޫލަށް އެކަނި ބަރޯސާވެގެން ތިބުމަކީ ދަރިފުޅުގެ މުސްތަގުބަލަށް އެޅޭ ވަރަށް ބޮޑު ހުރަހެކެވެ.
އަދުގެ ޒަމާނަކީ ޓެކްނޮލޮޖީ އާއި މީޑިއާގެ ސަބަބުން ތަރުބިއްޔަތުގެ މަގުގައި ގިނަގުނަ ގޮންޖެހުންތަކެއް ކުރިމަތިވެފައިވާ ޒަމާނެކެވެ. އިންޓަނެޓާއި، ސޯޝަލް މީޑިއާ އަދި ބޭރުގެ ނުފޫޒުތަކަކީ އަޅުގަނޑުމެންގެ އިސްލާމީ އުސޫލުތަކާ ދެކޮޅަށް ހިނގާ "ހަނގުރާމައެއް" ފަދަ ކަންކަމެވެ. މިފަދަ ވަގުތެއްގައި މައިންބަފައިން ފާރަވެރިވެ، ދަރިންނަށް ދީނީ އަގީދާ ވަރުގަދަކޮށްދިނުމަށް ނުގުޑާ އަޒުމެއްގައި ހުންނަންޖެހެއެވެ. މި ހަނގުރާމައިގައި ކުޑަވެސް ދޫދިނުމެއް ދީފިނަމަ، އޭގެ ހިތި ނަތީޖާ މުޅި އުމުރަށް ތަހައްމަލު ކުރަންޖެހިދާނެއެވެ.
މާތް ﷲ ކީރިތި ޤުރުއާނުގައި ވަނީ ދަރިންނާއި އާއިލާ ނަރަކައިގެ އަލިފާނުން ސަލާމަތްކުރުމަށް އަމުރުކުރައްވާފައެވެ. ސޫރަތުއް ތަޙްރީމްގެ 6 ވަނަ އާޔަތުގައި ވަނީ: (يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا) މާނައީ: "އޭ އީމާންވެއްޖެ މީސްތަކުންނޭވެ! ތިޔަބައިމީހުންގެ އަމިއްލަ ނަފްސުތަކާއި، ތިޔަބައިމީހުންގެ އަހުލުވެރިން ނަރަކައިގެ އަލިފާނުން ސަލާމަތްކުރާށެވެ!" މި އާޔަތުން އެނގެނީ ދަރިން ހެޔޮގޮތުގައި ބޮޑުކުރުމަކީ އާދައިގެ ކަމެއް ނޫން ކަމާއި، އެއީ އާޚިރަތުގެ ބޮޑު އަޒާބުން ސަލާމަތްވުމަށްޓަކައި ކުރަންޖެހޭ މުހިންމު މަސައްކަތެއް ކަމެވެ.
ދަރިން ތަރުބިއްޔަތު ކުރުމަކީ ވަރުބަލިވުމެއް ނެތި ކުރަންޖެހޭ ޖިހާދެކެވެ. ދުނިޔޭގެ ފިތުނަތަކުން ދަރިން ސަލާމަތްކޮށް، ހެޔޮލަފާ ސާލިހު ކުދިންތަކަކަށް ހެދުމަށްޓަކައި މައިންބަފައިން ކެނޑިނޭޅި މަސައްކަތް ކުރަންޖެހެއެވެ. މިކަމުގައި އިހުމާލުވެއްޖެނަމަ، އޭގެ ގެއްލުން ލިބޭނީ ހަމައެކަނި ދަރިފުޅަކަށް ނޫނެވެ، މުޅި މުޖުތަމައަށެވެ. އެހެންކަމުން، މިއީ ދަރިއަކު ދުނިޔޭގައި ހުރިހާ ހިނދަކު މައިންބަފައިން ކުރިއަށް ގެންދަންޖެހޭ، ނިންމާނުލެވޭނެ ހަނގުރާމައެކެވެ.