މިއަހަރުގެ ރޯދަ މަހު ފިތުރު ޒަކާތުގެ ގޮތުގައި ގޮވާމުން ލިބުނު ތަކެތި ބަހަން ފަށައިފިއެވެ. ޒަކާތު ހައުސްއިން ބުނި ގޮތުގައި މާލެ ސިޓީގައި ގޮވާމުން ޒަކާތް ބަލައިގަންނަން ފެށީ މި މަހުގެ 14 ވަނަ ދުވަހުއެވެ.
ލިބިފައިވާ ގޮވާމުގެ ތަފުސީލުތަކަށް ބަލާއިރު ޖުމްލަ 5.7 ޓަނުގެ ގޮވާން ވަނީ ލިބިފައެވެ. މީގެ ތެރޭގައި އެންމެ ގިނައީ ބާސްމަތީ ހަނޑުލެވެ. އެއީ 3.2 ޓަނުގެ ބާސްމަތީ ހަނޑުލާއި، 1.4 ޓަނުގެ އާދައިގެ ހަނޑުލުގެ އިތުރުން 300 ކިލޯގެ ފުށް ކަމަށް ޒަކާތު ހައުސްއިން ބުންޏެވެ.
މި ތަކެތި ބެހުމުގެ މަސައްކަތް ކުރިއަށްދާނީ މާލޭގައި ހުންނަ ސީއެޗްއެސްއީގައެވެ. ޒަކާތް ބަހަން ހަމަޖެހިފައިވަނީ މި މަހުގެ 17 އަދި 18 ވަނަ ދުވަހުއެވެ. މި ދެ ދުވަހު ވެސް ހެނދުނު 10:00 އިން 12:00 އަށް އަދި މެންދުރުފަހު 1:00 އިން 3:00 އަށް ތަކެތި ބަހާނެއެވެ.
ދައުލަތުގެ މީޑިއާ މެދުވެރިކުރައްވައި މިކަން ހާމަކުރައްވަމުން ޒަކާތު ހައުސްގެ އެސިސްޓެންޓް ޑިރެކްޓަރު ޖެނަރަލް މޫސާ މުއިއްޒު ބުންޏެވެ. އޭނާ ބުނީ މި ތަކެތި ބަހަނީ ފަގީރުންގެ ދަފުތަރުގައި ހިމެނޭ މާލޭގައި ދިރިއުޅޭ މީހުންނަށް ކަމަށެވެ.
ފަގީރުންނަށް ބެހުމަށްފަހު ބާކީވާ ތަކެތި ބޭނުންޖެހިފައިވާ އެހެން ފަރާތްތަކަށް ދިނުމަށް ވަނީ ނިންމާފައެވެ. އެގޮތުން މި މަހުގެ 19 ވަނަ ދުވަހު އެ ތަކެތި ޖެންޑާ މިނިސްޓްރީއާ ހަވާލުކުރާނެ ކަމަށް ޒަކާތު ހައުސްއިން ބުންޏެވެ.
މިއަހަރުގެ ރޯދަ މަހުގެ ފުރަތަމަ 15 ދުވަހު ޒަކާތުގެ ގޮތުގައި 5.4 މިލިއަން ރުފިޔާ ލިބިފައިވެއެވެ. މިއީ ފާއިތުވި ތިން އަހަރާ އަޅާބަލާއިރު ރޯދަ މަހުގެ ފުރަތަމަ 15 ދުވަހު އެންމެ ގިނައިން ފައިސާ ލިބުނު އަހަރެވެ.
ފައިސާގެ ގޮތުގައި ލިބޭ ޒަކާތް ޖަމާކުރަމުންދަނީ ފަގީރުންގެ ދަފުތަރުގައި ހިމެނޭ މީހުންގެ ބޭންކު އެކައުންޓުތަކަށެވެ. ގޮވާމުން ޒަކާތް ބަލައިގަތުމުގެ މަސައްކަތް ވެސް ވަނީ ވަރަށް އިންތިޒާމުވެގެން ކުރިއަށް ގެންގޮސްފައެވެ.