ސަރުކާރުން އަލަށް ފަށަން ތައްޔާރުވަމުން އަންނަ ޓެކްސީ ލައިންގެ ހިދުމަތް ވިލިމާލެއަށް ފުޅާކޮށް، އެ ރަށަށް ފަސް ކާރު ހާއްސަކުރަން ނިންމައިފިއެވެ. މިކަން ހާމަކުރެއްވީ ހައުސިން އެން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބެވެ.
ބޭންކް އޮފް މޯލްޑިވްސް އިން ވިލިމާލޭގައި އަޅާ 300 ހައުސިން ޔުނިޓުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، މާލޭގައި ފަށާ ޓެކްސީ ލައިންގެ ހިދުމަތާއެކު ވިލިމާލޭގެ ރައްޔިތުންނަށް ވެސް އެ ހިދުމަތް ލިބިގެންދާނެ ކަމަށެވެ. މިއީ ރައްޔިތުންނަށް ޓެކްސީ ހޯދަން ފަސޭހަކޮށްދީ، ހިދުމަތުގެ ފެންވަރު ރަނގަޅުކުރުމަށް ސަރުކާރުން ފަށާ މުހިންމު މަސައްކަތެކެވެ.
މި ހިދުމަތަށް ބޭނުންކުރާނީ 100 ޕަސަންޓު ކަރަންޓުން ދުއްވާ، ތިމާވެއްޓާ ރައްޓެހި އުޅަނދުތަކެކެވެ. އެހެންކަމުން މިއީ ވިލިމާލޭގެ މާހައުލާ ގުޅޭނެ، އަދި އެ ރަށުގެ ރައްޔިތުންނަށް ދަތުރުފަތުރު ކުރުމުގައި ބޮޑު ލުއިފަސޭހައެއް ލިބިގެންދާނެ ކަމެއް ކަމަށް ސަރުކާރުން ދެކެއެވެ.
"ސަރުކާރުން މިހާރު ފެށުމަށް ތައްޔާރުވަމުންދާ މާލެ ޓެކްސީ ލައިންގެ ހިދުމަތް ފެށޭއިރުގައި މި ރަށުގައި ވެސް އޭގެ ފަސް ޓެކްސީ ގެނެސް ރައްޔިތުންނަށް އެ ހިދުމަތް ދެވިގެންދާނެކަން،" މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ، މިއީ އިލެކްޓްރިކް ޓެކްސީތަކަކަށް ވާތީ، ވިލިމާލޭގެ މާހައުލަށާއި ރައްޔިތުންގެ ފަސޭހަކަމުގެ އިތުރުން ރަށުގެ ތަރައްގީއަށް މިއީ ވަރަށް މުހިންމު ރޯލެއް އަދާކުރާނެ ކަމެއް ކަމާމެދު ޝައްކު ނުކުރައްވާ ކަމަށެވެ.
އަންނަ އޭޕްރީލް މަހުގެ ދެވަނަ ދުވަހު މި ހިދުމަތް ފެށުމަށް ތައްޔާރުވަމުން އަންނައިރު، މިކަމަށް ހާއްސަކޮށްފައިވާ މޯބައިލް އެޕްލިކޭޝަނެއް މެދުވެރިކޮށް 24 ގަޑިއިރު ހިދުމަތް ލިބޭނެއެވެ. މި ހިދުމަތަށް ބޭނުންކުރާ ޗަންގަން ބްރޭންޑުގެ 150 ކާރުގެ ތެރެއިން 60 ކާރު މިހާރު މާލެ ގެނެސްފައިވާއިރު، ބާކީ 90 ކާރު މި މަހުގެ ފަހުކޮޅު ރާއްޖެ ގެންނާނެއެވެ. ސަރުކާރުން ގަބޫލުކުރާ ގޮތުގައި މި ހިދުމަތާއެކު މުޅި ދަތުރުފަތުރުގެ ނިޒާމަށް ހެޔޮ ބަދަލެއް އަންނާނެއެވެ.