ބިންވެރިޔާ ސްކީމުގެ ދަށުން ގޯތި ލިބި، އެ ގޯތި އިމާރާތް ކުރެވޭނެ ތަނަވަސްކަން ނެތް ފަރާތްތަކަށް، ގޯތި ދޫކޮށްލުމަށްފަހު ފްލެޓަށް އެދި ހުށަހެޅުމުގެ ފުރުސަތު ހުޅުވާލަން ސަރުކާރުން ނިންމައިފިއެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވީ، މި ފުރުސަތު ކުރިއަށް އޮތް ދެ ހަފުތާއެއްހާ ދުވަހުގެ ތެރޭގައި ހުޅުވާލާނެ ކަމަށެވެ. މިއީ ބޯހިޔާވަހިކަމުގެ މަޝްރޫއުތަކުގެ ތެރެއިން ރައްޔިތުންނަށް ލުއިފަސޭހަ ގޮތްތަކެއް ހޯދައިދިނުމަށް ސަރުކާރުން ނިންމި ނިންމުމެކެވެ.
ރައީސް ވިދާޅުވީ ބިންވެރިޔާގެ ދަށުން ގޯތި ލިބުނު މީހުންގެ ތެރޭގައި، އެ ގޯތި ހެދޭނެ ވަކި ދުވަހެއް ނޭނގޭ ނިކަމެތި އާއިލާތައް އެބަތިބި ކަމަށެވެ. އެފަރާތްތަކުން އެ ގޯތި އިމާރާތް ކުރަން ދުވަސް ނަގާނެތީ، މިހާރު ސަރުކާރުން އަޅަމުންދާ ފްލެޓް ކެޓެގަރީއަށް ބަދަލުވުމުގެ ފުރުސަތަކަށް ވަރަށް ގިނަ ރައްޔިތުން އެދެމުންދާ ކަމަށް ރައީސް ފާހަގަކުރެއްވިއެވެ. "އެހެންވީމާ އަޅުގަނޑުމެންގެ ތެރޭގައި މަޝްވަރާކޮށްފައި އެކަމަށް ގުޅުވާލެވޭނެ ގޮތެއް މި ކަނޑައެޅީ،" ރައީސް ވިދާޅުވިއެވެ.
ނަމަވެސް ރައީސް ވިދާޅުވި ގޮތުގައި، ގޯތި ލިބިފައި ތިބި މީހުންނަކީ ކުރިން ގޯއްޗެއް ލިބިފައި ނެތް މީހުންނަށްވުރެ ރަނގަޅު ހާލަތެއްގައި ތިބި ބައެއް ކަމުން، ފްލެޓަށް ކުރިމަތިލުމުގެ ފުރުސަތު ދިން ނަމަވެސް އެމީހެއްގެ ހާލަތަށް ސަރުކާރުން ރިއާޔަތް ކުރާނެއެވެ. މި ނިންމުމުގެ ސަބަބުން ގޯތި އިމާރާތްކުރަން މާލީ ގޮތުން ދަތިވެފައިވާ ފަރާތްތަކަށް އަވަސް ބޯހިޔާވަހިކަމެއް ލިބުމުގެ މަގު ފަހިވެގެންދާނެއެވެ. މި މަސައްކަތްތަކަކީ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަތަކަށް ދާއިމީ ހައްލެއް ހޯދައިދިނުމަށް ސަރުކާރުން ކުރަމުންދާ މަސައްކަތްތަކެކެވެ.