އިންސާނާއަކީ އެކަނި އުޅެވޭނެ މަޚްލޫޤެއް ނޫނެވެ. ދިރިއުޅުމުގެ ކޮންމެ މަރުޙަލާއެއްގައިވެސް އެކި މިޒާޖުގެ، އެކި ފެންވަރުގެ މީހުންނާ ބައްދަލުވެ، ގުޅުންތައް ބަދަހިވެއެވެ. ނަމަވެސް، ދިރިއުޅުމުގެ ދަތުރުގައި އަޅުގަނޑުމެންނާ ބައްދަލުވާ ކޮންމެ މީހަކީ އަޅުގަނޑުމެންގެ މުސްތަޤުބަލަށް ނުވަތަ ދީނީ އަދި ދުނިޔަވީ ލާބައަށް ހުރި މީހަކަށް ނުވެދާނެއެވެ. އެހެންކަމުން، ބައެއް ހާލަތްތަކުގައި ބައެއް މީހުންނާ އޮންނަ ގުޅުން ކަނޑާލައި، އެމީހުން ދޫކޮށްލުމަކީ ދިރިއުޅުމުގައި ކުރަންޖެހޭ ވަރަށް މުހިންމު ކަމެކެވެ.
ބައެއް މީހުން ދޫކޮށްލަން ޖެހެނީ ހަމައެކަނި ތިމާގެ އަމިއްލަ ނަފްސުގެ ސަލާމަތަކަށް ނޫނެވެ. އެއީ ތިމާގެ ހެވަށާއި، އަދި އެ ދޫކޮށްލެވޭ މީހާގެވެސް ހެވަށެވެ. ބައެއް ފަހަރު ދެމީހެއްގެ މެދުގައި އޮންނަ ގުޅުމެއްގެ ސަބަބުން ދެމީހުންނަށްވެސް ކުރިއެރުމެއް ނުލިބި، އެކަކު އަނެކަކަށް ހުރަހަކަށް ވެދާނެއެވެ. މިފަދަ ހާލަތްތަކުގައި އެ ގުޅުމަކުން ދުރުވުމަކީ ދެމީހުންނަށްވެސް އާ ފެށުމަކަށް މަގުފަހިވެ، ހެޔޮ ބަދަލުތަކެއް އައުމަށް ލިބޭ ފުރުޞަތެކެވެ.
މީގެ އިތުރުން، ޖަމާޢަތުގެ ލާބައާއި މަންފާއަށްޓަކައިވެސް ބައެއް މީހުންނާ ދުރުވާންޖެހެއެވެ. މުޖުތަމަޢުގެ ތެރޭގައި ފިތުނަ އުފައްދާ، ނުބައި އާދަތައް ފަތުރާ މީހުންނާ ގުޅުން ބޭއްވުމަކީ މުޅި ޖަމާޢަތަށް އޭގެ ނޭދެވޭ އަސަރު ފޯރާނެ ކަމެކެވެ. އިސްލާމީ ރަހުމަތުގެ ތެރެއިންވެސް އަޅުގަނޑުމެންނަށް ދަސްކޮށްދެނީ ނުބައި މީހުންގެ ކިބައިން ސަލާމަތްވެ، ހެޔޮލަފާ މީހުންގެ ސުލޫކުގައި ހިފުމަށެވެ. ނުބައި ރަޙުމަތްތެރިންގެ ސަބަބުން ތިމާގެ އަޚްލާޤާއި، ދީންވެރިކަން ގެއްލިގެންދާނަމަ، އެފަދަ މީހުންނާ އެކުގައި އުޅުމުގެ އެއްވެސް ބޭނުމެއް ނެތެވެ.
ކޮންމެ މީހަކީވެސް އެމީހަކު ގެންގުޅޭ އެކުވެރިންގެ ދީނާއި އުޅުމުގެ މަތީގައިވާ މީހެކެވެ. އެބައިމީހުންގެ ސަބަބުން ތިމާގެ ދިރިއުޅުން ހަލާކުވެ، އާޚިރަތް ގެއްލޭ ފަދަ މީހުންނާ ގުޅިގެން އުޅުމަކީ އަމިއްލަ ނަފްސަށް ދެވޭ އަނިޔާއެކެވެ. އެފަދަ ގުޅުންތަކުގެ ސަބަބުން ތިމާގެ ހިތް ނުތަނަވަސްވެ، ދިރިއުޅުމުގެ އަމާޒުތައް ގެއްލިގެންދާނަމަ، އެއީ އެކުގައި ތިބެންޖެހޭނެ ބައެއް ނޫނެވެ.
މީހުން ދޫކޮށްލުމާއި ގުޅުންތައް ނިންމާލުމަކީ ހިތަށް ތަދުވާ ކަމަކަށް ވިޔަސް، އެއީ ބައެއް ފަހަރު އަމާން އައްސޭރިއަކަށް ދަތުރުކުރުމަށްޓަކައި ކޮންމެހެން ކުރަންޖެހޭ ކަމެކެވެ. ތިމާގެ އީމާންތެރިކަމާއި، އަޚްލާޤާއި، އަދި ދުނިޔަވީ ކުރިއެރުމަށް ހުރަސްއަޅާ ކޮންމެ ގުޅުމަކީ ދޫކޮށްލަންޖެހޭ ގުޅުމެކެވެ. ހަގީގީ ކާމިޔާބީއަކީ ހެޔޮލަފާ މީހުންނާއެކު ދިރިއުޅުން ބިނާކޮށް، ނުބައި މަގުތަކުން ދުރުހެލިވުމެވެ.