ރާއްޖޭގެ ބޭރު ފައިސާގެ ގާނޫނަށް ގެނައި ބަދަލުތަކާއެކު، ސަރުކާރުން އިންޓަނޭޝަނަލް މާލީ ބާޒާރުގައި ވިއްކާފައިވާ ބޮޑު ސުކޫކު ދަރަނި ދައްކައި ހަލާސްކުރުމަށް ބޮޑު އެހީތެރިކަމެއް ލިބިފައިވާ ކަމަށް ރާއްޖޭގެ މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭއިން ނެރުނު ނޫސް ބަޔާނެއްގައި ބުނެފައިވަނީ، 2021 ވަނަ އަހަރު ސަރުކާރުން ނަގާފައިވާ 500 މިލިއަން ޑޮލަރުގެ ސުކޫކާއި އޭގެ ކޫޕަން ޕޭމަންޓަށްވާ ޖުމުލަ 524.68 މިލިއަން ޑޮލަރު، މި އޭޕްރީލް މަހުގެ 2 ވަނަ ދުވަހު ދައްކައި ނިންމާފައިވާ ކަމަށެވެ. މިއީ ދައުލަތުގެ ފިސްކަލް އެޖެންޓުގެ ހައިސިއްޔަތުން އެ އޮތޯރިޓީން އަދާކުރި ދަރަންޏެކެވެ.
މި ބޮޑު ދަރަނި ދެއްކުމަށް ފައިސާ ހަމަޖައްސާފައިވަނީ ދައުލަތުގެ ރަސްމީ ރިޒާވުގައި ހުރި ފައިސާގެ އިތުރުން، ދަރަނި އަދާކުރުމަށް ހާއްސަކޮށްފައިވާ ސޮވެރިން ޑިވެލޮޕްމަންޓް ފަންޑު (އެސްޑީއެފް) ބޭނުންކޮށްގެން ކަމަށް މަރުކަޒީ ބޭންކުން މައުލޫމާތު ދެއެވެ.
އެމްއެމްއޭއިން ބުނި ގޮތުގައި، 2024 ވަނަ އަހަރު ބޭރު ފައިސާއާ ބެހޭ ގާނޫނަށް ގެނައި އިސްލާހު ތަންފީޒުކުރަން ފެށުމުން ރާއްޖޭގެ ބޭރު ފައިސާގެ ނިޒާމު ވަނީ ވަރަށް ބޮޑަށް ހަރުދަނާވެފައެވެ. އޭގެ ނަތީޖާއެއްގެ ގޮތުން ދައުލަތަށް ޑޮލަރުން ލިބޭ އާމްދަނީ އިތުރުވެ، ބޮޑެތި ދަރަނިތައް ދެއްކުމުގައި މުހިންމު ކުރިއެރުންތަކެއް ލިބިފައިވާކަން އެ އޮތޯރިޓީން ފާހަގަކުރިއެވެ.
މިފަދަ ކަންކަން ކާމިޔާބުކަމާއެކު ތަންފީޒުކުރެވިފައިވަނީ ސަރުކާރާއި ދައުލަތުގެ އެހެނިހެން އިދާރާތަކާ ގުޅިގެން ކުރެވުނު މަސައްކަތުންނެވެ. އަދި ކުރިއަށް އޮތް ތަނުގައިވެސް ރާއްޖޭގެ ރިޒާވު އިތުރަށް ވަރުގަދަކުރުމަށްޓަކައި ހަރުދަނާ ސިޔާސަތުތައް ރާވައި ތަންފީޒުކުރަމުން ގެންދާނެ ކަމުގެ ޔަގީންކަން އެމްއެމްއޭއިން ވަނީ ދީފައެވެ.