މިއަދު ކުރިއަށްދާ އިންތިހާބުތަކުގައި ބައިވެރިވެ، ގޭތެރެއިން ނުކުމެ ވޯޓުލުމުގެ ގާނޫނީ ހައްގު އަދާކުރެއްވުމަށް ރައީސް ޑރ. މުހައްމަދު މުއިއްޒު އެދިވަޑައިގެންފިއެވެ.
ރައީސް ޑރ. މުއިއްޒު ވޯޓުލައްވާފައިވަނީ ތާޖުއްދީން ސްކޫލްގައި ބަހައްޓާފައި ހުރި ވޯޓު ފޮއްޓަށެވެ. މިއަދު ކުރިއަށްދަނީ ސިޓީތަކުގެ މޭޔަރުންނާއި ކައުންސިލް މެމްބަރުން ހޮވުމުގެ ވޯޓުގެ އިތުރުން، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމާމެދު ރައްޔިތުންނަށް ފެންނަ ގޮތެއް ބެލުމަށް ނަގާ ހާއްސަ ވޯޓެކެވެ.
ވޯޓުލެއްވުމަށް ފަހު ނޫސްވެރިންނާ ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ، ވޯޓުލުމަކީ ކޮންމެ ރައްޔިތަކަށް ވެސް ލިބިގެންވާ ވަރަށް މުހިންމު ހައްގެއް ކަމަށެވެ. އެހެންކަމުން، އެއްވެސް ފަސްޖެހުމެއް ނެތި މި ގާނޫނީ ހައްގު އަދާކުރެއްވުމަށް އެމަނިކުފާނު ވަނީ ހުރިހާ ރައްޔިތުންނަށް އިލްތިމާސްކުރައްވާފައެވެ.
މިއަދުގެ އިންތިހާބުތަކުގެ ވޯޓުލުން ކުރިއަށް ދާނީ ހެނދުނު 8:00 އިން ހަވީރު 4:00 އަށެވެ. އިލެކްޝަންސް ކޮމިޝަނުން ހާމަކޮށްފައިވާ ގޮތުގައި، މި އިންތިހާބުތަކުގައި ޖުމްލަ 294،876 މީހުންނަށް ވޯޓުލުމުގެ ހައްގު ލިބިގެންވެއެވެ. ވޯޓުލާ މަރުކަޒަށް ދާ ކޮންމެ މީހަކަށްވެސް ތިން ކަރުދާސްކޮޅު ދޭނެއެވެ. އަދި ކޮންމެ ކަރުދާހެއްވެސް ވައްޓާލަން ޖެހޭނީ އެ އިންތިހާބަކަށް ހާއްސަކޮށްފައިވާ ފޮއްޓަށެވެ.
ރައްޔިތުންނަށް ވޯޓުލުމުގައި ފަސޭހަ އިންތިޒާމުތަކެއް ހަމަޖެއްސުމުގެ ގޮތުން، ރާއްޖޭގެ ހުރިހާ ރަށްރަށާއި ރިސޯޓުތަކުގެ އިތުރުން ދައުލަތުގެ ބެލުމުގެ ދަށުގައި ހުންނަ މަރުކަޒުތަކުގައި ޖުމްލަ 588 ވޯޓު ފޮށި ވަނީ ބަހައްޓާފައެވެ.