ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވޯޓުލާ މީހުންގެ ޖުމްލަ ނިސްބަތް 70 ޕަސަންޓަށް ވުރެ މައްޗަށް އަރާނެ ކަމަށް އުއްމީދުކުރާ ކަމަށް އިލެކްޝަންސް ކޮމިޝަނުން ހާމަކޮށްފިއެވެ. އީސީން މިހެން ބުނީ މިއަދު ހަވީރު 4:00 އާ ހަމައަށް ވޯޓުލީ މީހުންގެ ތަފާސްހިސާބުތައް އާންމުކުރަމުންނެވެ. އެ އޮފީހުން ބުނީ ފަހު ގަޑިތަކުގައި ވޯޓުލާ މީހުންގެ އަދަދު ވަރަށް ބޮޑަށް އިތުރުވެފައިވާ ކަމަށެވެ.
ހަވީރު 4:00 އާ ހަމައަށް ވޯޓުލާފައިވަނީ ޖުމްލަ 185,709 މީހުންނެވެ. މިއީ ވޯޓުލުމުގެ ހައްގު ލިބިފައިވާ އާބާދީގެ 62.98 ޕަސަންޓެވެ. މީގެ ތެރޭގައި ހިމެނެނީ 92,567 އަންހެނުންނާއި 93,142 ފިރިހެނުންނެވެ. މެންދުރު 2:00 އާ ހަމައަށް ވޯޓުލީ މީހުންގެ ނިސްބަތް 44 ޕަސަންޓުގައި ހުރުމަށްފަހު، ފާއިތުވި ދެ ގަޑިއިރުގެ ތެރޭގައި ވޯޓުލީ މީހުންގެ އަދަދު ވަނީ ވަރަށް ބޮޑަށް މަތިވެފައެވެ.
އިންތިހާބުގެ ވޯޓުލާ ވަގުތު ހަވީރު 5:00 އާ ހަމައަށް އިތުރުކޮށްފައިވާއިރު، އަދިވެސް 1 ލައްކައަށް ވުރެ ގިނަ މީހުން ވޯޓުލާން ބާކީ ތިބިކަމަށް އީސީން ބުންޏެވެ. ވޯޓުލާ މަރުކަޒުތަކުގެ ކިއުތައް އަދިވެސް ދިގުކޮށް ހުރުމާއެކު، އޮފިޝަލުން ދަނީ ވޯޓުލުމުގެ ކަންކަން އަވަސްކުރުމަށް މަސައްކަތް ކުރަމުންނެވެ. ބާކީ އޮތް ވަގުތުގެ ތެރޭގައި ވޯޓުލާ މީހުންގެ ޖުމްލަ ނިސްބަތް 70 ޕަސަންޓަށް ވުރެ މަތިވާނެ ކަމަށް ބެލެވޭ ކަމަށް އެ އޮފީހުން ބުންޏެވެ.