"އަޑިގަނޑަކަށްފަހު އުސްގަނޑެއް އަންނާނެއެވެ" މިއީ ދިވެހި އަދަބީ ބަސްތަކުގެ ތެރެއިން ހަރުބަހެކެވެ.
މިބަހުގެ ބަހަވީ މާނައަށް ބަލައިލާނަަމަ، މި ބަހުގައި އެ ބުނެވެނީ އަޑިގަނޑެއް އައިއްސި ނަމަ، އޭގެ ކުރިމަތީގައި އުސްތަނެއް ވާނޭ ވާހަކައެވެ. އެހެނީ އަޑި ކޮންމެ ތަނެއްގެ ވަށައިގެން އުސްތަނެއް ކޮންމެވެސް ހިސާބެއްގައި ވާނެތީއެވެ.
މި ބަހުގެ ހަގީގީ މާނައަށް ބަލައިލަމާ ހިނގާށެވެ. މި ބަހުގައި މި ބުނާ އަޑިގަނޑުގެ ހަގީގީ މާނައަކީ ދިރިއުޅުމުގައި ދިމައިވާ ދަތިތަކާއި، ހިތްދަތި ހާލަތްތަކާއި، އަދި މާލީ ގޮތުން މީހަކު ދަތިވާ ދަތިވުމެވެ. އަދި މި ބަހުގައި މި ބުނާ އުސްގަނޑުގެ ހަގީގީ މާނައަކީ ކާމިޔާބީއާއި، ކުރިއެރުމާއި އުފާވެރިކަމުގެ ވާހަކައެވެ.
މިއީ ހަގީގަތުގައި ވަރަށް ނުފޫޒުގަދަ ނުވަތަ ބާރުގަދަ ބަހެކެވެ. އާއްމުގޮތެއްގައި މި ބަސް ބޭނުން ކޮށް އުޅެނީ ހިތްވަރުދިނުމުގެ ގޮތުންނެވެ. އެގޮތުން، ދަތި ހާލުގައިވާ މީހާއަށް ނުވަތަ ހިތާމައެއް، މާޔޫސްކަމެއް ކުރިމަތިވެފައިވާ މީހާއަށް ހިތްވަރު ދިނުމުގެ ގޮތުން މި ބަސް ބޭނުންކޮށް އުޅެއެވެ.
މިސާލަކަށް ބަލައިލާނަމަ، މީހެއްގެ އަތްމަތި ދަތިވެ، ހަރަދު ބަރަދު ކުރުމުގައި ބޮޑެތި ގޮންޖެހުންތަކާއި ކުރިމަތިވެ، އެމީހަކު މާޔޫސްކަމުގައި ވާ ހާލަތެއްގައި، އެމީހަކަށަ ހިތްވަރުދިނުމުގެ ގޮތުން، "އަޑިގަނޑަކަށްފަހު އުސްގަނޑެއް އަންނާނެ" އޭ ބުނެ އުޅެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން