މިއަދު ބޭއްވި ލޯކަލް ކައުންސިލް އިންތިހާބުގެ ވަގުތީ ނަތީޖާ ދައްކާގޮތުން، ފުވައްމުލައް ސިޓީގެ މޭޔަރު ކަމުގެ ގޮނޑި މިހާރުގެވެސް މޭޔަރު އިސްމާއީލް ރަފީގު ކާމިޔާބު ކުރައްވައިފިއެވެ. މިއާއެކު އޭނާ ވަނީ ވިދިވިދިގެން ދެވަނަ ދައުރަކަށް އެ ސިޓީގެ މޭޔަރުކަން ކަށަވަރުކުރައްވާފައެވެ.
ފުވައްމުލަކުގެ އެކި ދާއިރާތަކުން ލިބެމުންދާ ވަގުތީ ނަތީޖާތަކަށް ބަލާއިރު، އިސްމާއީލް ރަފީގު ވަނީ އޭނާއާ ވާދަކުރެއްވި ކެންޑިޑޭޓުންގެ މައްޗަށް ބޮޑު ތަފާތަކުން ކުރިހޯއްދަވާފައެވެ. ގިނަ ވޯޓު ފޮށިތަކުގެ އަގުލަބިއްޔަތު އޭނާ ހޯއްދަވާފައިވާއިރު، މިއީ ފުވައްމުލަކު ސިޓީ ކައުންސިލްގެ ތާރީޚުގައިވެސް މޭޔަރުކަން ދިފާއުކުރެއްވި ފުރަތަމަ ފަހަރެވެ.
މި ކާމިޔާބީއާ ގުޅިގެން އިސްމާއީލް ރަފީގުގެ ސަޕޯޓަރުން ދަނީ ފުވައްމުލަކުގައި އުފާފާޅުކުރަމުންނެވެ. އިންތިހާބުގެ ރަސްމީ ނަތީޖާ އިލެކްޝަންސް ކޮމިޝަނުން އިއުލާންކުރާނީ ހުރިހާ ފޮށިތަކެއްގެ ނަތީޖާ ޝީޓުތައް ރަނގަޅަށް ޗެކްކުރުމަށްފަހުގައެވެ. މިއަދުގެ އިންތިހާބުގައި ފުވައްމުލަކުން ގިނަ އަދަދެއްގެ ބަޔަކު ވޯޓުލާން ނުކުމެފައިވާކަން ފާހަގަކުރެވެއެވެ.