ދުނިޔޭގެ ސިއްހަތު ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޮނުއްވި މެސެޖުގައި، ރާއްޖޭގެ ސިއްހީ ސިޔާސަތުތައް ބިނާވެފައިވަނީ ޒަމާނީ ސައިންސާއި ޓެކްނޮލޮޖީ އަދި ސާބިތު ހެކިތަކުގެ މައްޗަށްކަން ފާހަގަކުރައްވައިފިއެވެ. ސޯޝަލް މީޑިއާ އާއި އޭއައިގެ ސަބަބުން ހަގީގަތާ ހިލާފު ދޮގު މައުލޫމާތު ފެތުރެމުންދާ މި ދަނޑިވަޅުގައި، ސިއްހީ ނިންމުންތައް ނިންމުމުގައި ސައިންސަށް ބިނާވުން ކުރިއަށްވުރެ ބޮޑަށް މުހިންމުވެފައިވާ ކަމަށް ރައީސް ވިދާޅުވިއެވެ.
ސިއްހީ ނިޒާމު ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކުގެ ތަފްސީލު ހިއްސާކުރައްވަމުން ރައީސް ވިދާޅުވީ، ޑިޖިޓަލް ހެލްތުގެ ހިދުމަތް ފުޅާކުރުމާއި، ސިއްހީ މައުލޫމާތު ބެލެހެއްޓުމުގެ ނިޒާމު އެއްވިއުގައަކުން ގުޅާލުމަށް އިސްކަންދެއްވާ ކަމަށެވެ. އަދި ދުނިޔޭގެ ސިއްހަތު ޖަމިއްޔާ (WHO) ފަދަ ބައިނަލްއަގުވާމީ އިދާރާތަކާ ގުޅިގެން، ސިއްހީ ދާއިރާގެ އެންމެ ފަހުގެ ހޯދުންތަކުގެ މަންފާ ރާއްޖެއަށް ހޯދައިދިނުމަށް މަސައްކަތް ކުރައްވާނެ ކަމުގެ ޔަގީންކަން އެމަނިކުފާނު ދެއްވިއެވެ.
ރައީސްގެ މެސެޖު ނިންމަވާލެއްވީ ސިއްހީ ދިރާސާތަކަށް ކުރާ އިންވެސްޓްމަންޓް އިތުރުކުރުމަށް ގޮވާލައްވަމުންނެވެ. "ސިއްހަތަށްޓަކައި އެކުގައި، ސައިންސާއެކު ސާބިތުވެ ތިބުމަށް" ދިވެހި ރައްޔިތުންނަށާއި ބައިނަލްއަގުވާމީ މުޖުތަމައަށް ރައީސް އިލްތިމާސްކުރެއްވިއެވެ. މި މޭރުމުން ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ވެސް ވަނީ ދުޅަހެޔޮ މުސްތަގުބަލަކަށްޓަކައި ހެއްކަށް ބިނާވެފައިވާ ސިއްހީ ހައްލުތައް ހޯދުމުގެ މުހިންމުކަން ފާހަގަކުރައްވާފައެވެ.