މިދިޔަ އާދިއްތަ ދުވަހު ބޭއްވި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް އަލަށް އިންތިހާބުވި މެންބަރުން ހުވާކުރުމުގެ ރަސްމިއްޔާތު އަންނަ މެއި މަހުގެ 17 ވަނަ ދުވަހު ބޭއްވުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ނިންމައިފިއެވެ.
އެލްޖީއޭއިން މައުލޫމާތު ދޭ ގޮތުގައި، މުޅި ރާއްޖޭގައިވެސް ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުން ހުވާކުރުން ކުރިއަށްދާނީ އެއް ދުވަހެއްގެ އެއް ވަގުތެއްގައެވެ. މި ތާރީޚަކީ މިހާރު މަގާމުތަކުގައި ތިއްބެވި ކައުންސިލަރުންގެ ދައުރު ހަމަވާ ދުވަހެވެ.
މިދިޔަ އިންތިހާބުގެ ނަތީޖާއަށް ބަލާއިރު، މާލެ ސިޓީ ހިމެނޭހެން ރާއްޖޭގެ ހުރިހާ ސިޓީތަކެއްގެ މޭޔަރުކަމާއި، ސިޓީ ކައުންސިލްތަކުގެ މެޖޯރިޓީގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެޖޯރިޓީވެސް ކާމިޔާބުކޮށްފައިވަނީ އިދިކޮޅު އެމްޑީޕީންނެވެ. މީގެ އިތުރުން ގިނަ ރަށު ކައުންސިލްތަކުގެ ރައީސްކަންވެސް އެމްޑީޕީއާއި އަމިއްލަ ކެންޑިޑޭޓުން ވަނީ ހޯދާފައެވެ.
އާ ދައުރަކަށް އިންތިހާބުވި މެންބަރުން މަގާމާ ހަވާލުވުމަށް ތައްޔާރުވަމުންދާއިރު، މިއީ ލާމަރުކަޒީ ނިޒާމުގެ ދަށުން ރަށްރަށުގެ ތަރައްގީއަށް މުހިންމު މަސައްކަތްތަކެއް ފެށިގެންދާނެ ވަގުތެއް ކަމަށް ގިނަ ބަޔަކު ގަބޫލުކުރެއެވެ.