ދުނިޔޭގެ މަޝްހޫރު މިއުޒިކް ބޭންޑު، ބީޓީއެސްގެ ހަތް މެންބަރުން ސިފައިންގެ ހިދުމަތް ނިންމުމަށްފަހު، އެކުގައި ބާއްވާ ފުރަތަމަ ވޯލްޑް ޓުއަރ "އަރިރަންގް" މިއަދު ދެކުނު ކޮރެއާގެ ގޯޔަންގްގައި ފަށައިފިއެވެ. ގާތްގަނޑަކަށް ހަތަރު އަހަރުގެ މެދުކެނޑުމަކަށްފަހު ބާއްވާ މި ޓުއަރ ފެށުމުގެ ގޮތުން ގޯޔަންގް ސްޓޭޑިއަމްގައި ބޭއްވި ފުރަތަމަ ޝޯ ބަލާލުމަށް، ވާރޭގެ ތެރޭގައި ވެސް ގިނަ އަދަދެއްގެ ސަޕޯޓަރުން ވަނީ އެއްވެފައެވެ.
މި ޓުއަރއަކީ ކޭ-ޕޮޕް ތާރީހުގައި މިހާތަނަށް ބާއްވާ އެންމެ ބޮޑު ވޯލްޑް ޓުއަރއެވެ. މި ޓުއަރގައި ދުނިޔޭގެ 34 ސިޓީއެއްގައި 85 އަށްވުރެ ގިނަ ޝޯ ދިނުމަށް ވަނީ ހަމަޖެހިފައެވެ. މީގެ ތެރޭގައި އޭޝިއާ، އުތުރު އެމެރިކާ، ޔޫރަޕް އަދި ލެޓިން އެމެރިކާގެ ގައުމުތައް ހިމެނެއެވެ. މި ޓުއަރ ކުރިއަށްދާނީ 2027 ވަނަ އަހަރުގެ ނިޔަލަށެވެ. މިއީ މިއަހަރުގެ މާޗް މަހު ބީޓީއެސްއިން ނެރުނު އެ ބޭންޑުގެ ފަސްވަނަ އަލްބަމް "އަރިރަންގް" އިސްތިހާރު ކުރުމަށް ބާއްވާ ޓުއަރއެކެވެ.
މިއަދުގެ ޝޯއާ ގުޅޭގޮތުން ސޯޝަލް މީޑިއާގައި ސަޕޯޓަރުން ބުނީ، މިއީ ވަރަށް އުފާވެރި އަދި ހިތްގައިމު ވަގުތެއް ކަމަށެވެ. މި ޝޯގައި ބޭނުންކޮށްފައިވާ 360 ޑިގްރީގެ ސްޓޭޖަކީ ކޭ-ޕޮޕް ތާރީހުގައި ފެނުނު އެންމެ ބޮޑު އެއް ސްޓޭޖެވެ. މިއަދުގެ ޝޯއަށްފަހު ދެން އެންމެ އަވަހަށް ބީޓީއެސްގެ ޝޯތައް އޮންނާނީ މި މަހުގެ 17 އާއި 18 ގައި ޖަޕާނުގެ ޓޯކިޔޯގައެވެ. އޭގެ ފަހުން އެމެރިކާގެ ފްލޮރިޑާ އާއި ޓެކްސަސް ފަދަ ސިޓީތަކުގައި ޝޯތައް ބޭއްވުމަށް ވަނީ ތާވަލުކޮށްފައެވެ.
މި ޓުއަރގެ ސަބަބުން ސިނާއީ ގޮތުން ބޮޑު އާމްދަނީއެއް ލިބޭނެ ކަމަށް މާހިރުން ލަފާކުރެއެވެ. ބީޓީއެސްގެ ހަތް މެންބަރުން އަލުން އެކުގައި ސްޓޭޖުން ފެނުމަކީ ދުނިޔޭގެ އެކި ކޮޅުތަކުގައި ތިބި އެ ބޭންޑުގެ ސަޕޯޓަރުން އެންމެ ބޮޑަށް އިންތިޒާރު ކުރަމުން އައި ކަންތަކެވެ.