އީރާނާއި އެމެރިކާ އަދި އިސްރާއީލާ ދެމެދު އޮތް ހަމަލާ ބަދަލުކުރުން ހުއްޓާލުމުގެ އެއްބަސްވުމަށް އަމަލުކުރަން ފެށުމާ އެކު، އީރާނުގެ ވެރިރަށް ތެހެރާންގެ އާންމު ހާލަތު މަޑުމަޑުން އާންމު ހާލަތަކަށް ރުޖޫއަވާން ފަށައިފިއެވެ. ފާއިތުވި ހަ ހަފުތާގައި ދިން ވަރުގަދަ ހަމަލާތަކަށްފަހު، މިހާރު ތެހެރާންގެ ބާޒާރުތައް ހުޅުވައި ވިޔަފާރިތައް ވަނީ ފަށާފައެވެ. ނަމަވެސް ހަނގުރާމައިގެ ސަބަބުން ތަކެތީގެ އަގު ވަނީ 20 ޕަސަންޓާއި 30 ޕަސަންޓާ ދެމެދުގެ މިންވަރަކަށް އުފުލިފައެވެ.
މިދިޔަ ފެބްރުއަރީ މަހުގެ 28 ވަނަ ދުވަހު ފެށި މި ހަނގުރާމަ މެދުކަނޑާލީ ޕާކިސްތާނުން މެދުވެރިވެގެން ކުރި މަސައްކަތުންނެވެ. މި އެއްބަސްވުމުގެ ދަށުން އީރާނުން ވަނީ ހޯރްމުޒް ކަނޑުއޮޅި ވިޔަފާރި ބޯޓުފަހަރަށް ހުޅުވާލުމަށް އެއްބަސްވެފައެވެ. މިހާރު ޕާކިސްތާނުގެ އިސްލާމްއާބާދުގައި ދެ ގައުމުގެ މެދުގައި ދަނީ ދާއިމީ ހައްލެއް ހޯދުމަށް މަޝްވަރާ ކުރަމުންނެވެ. އީރާނުން ބޭނުންވަނީ މިހާރު އޮތް ދެ ހަފުތާގެ މުއްދަތު އިތުރުކޮށް، ހަމަލާތައް ދާއިމީކޮށް ހުއްޓާލުމަށެވެ.
ހަނގުރާމައިގެ ސަބަބުން އީރާނުގެ އިގްތިސާދަށް ވަނީ ބޮޑެތި ގެއްލުންތަކެއް ލިބިފައެވެ. ތެޔޮ އުފައްދާ ތަންތަނަށާއި ބަނދަރުތަކަށް ދިން ހަމަލާތަކުގެ ސަބަބުން ގިނަ ބައެއްގެ ވަޒީފާ ގެއްލި، އާންމު ދިރިއުޅުމަށް ވަނީ ބުރޫއަރާފައެވެ. ރިޕޯޓްތައް ބުނާ ގޮތުގައި މި ހަނގުރާމައިގައި އީރާނުން 1،700 އަށްވުރެ ގިނަ މީހުން ވަނީ މަރުވެފައެވެ. އާންމުން އުންމީދު ކުރަނީ މިހާރު ފަށާފައިވާ މަޝްވަރާތަކުން ހެޔޮ ބަދަލެއް އައިސް، ގައުމަށް ސުލްހަ ލިބޭނެ ކަމަށެވެ.