ޕާކިސްތާނުގެ އިސްލާމްއާބާދުގައި އީރާނާ އެކު ކުރި ސުލްހައިގެ މަޝްވަރާތައް އެއްބަސްވުމަކާ ނުލައި ނިމުމާ ގުޅިގެން، އީރާނުގެ ހުރިހާ ބަނދަރުތަކެއް އެމެރިކާގެ އަސްކަރިއްޔާއިން ބަންދުކޮށްފިއެވެ. އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ، މިއަދު ހެނދުނުން ފެށިގެން އީރާނަށް ވަންނަ އަދި އެ ގައުމުން ނުކުންނަ ހުރިހާ އުޅަނދެއް ހުއްޓުވަން ފަށާފައިވާ ކަމަށެވެ. މިއީ އީރާނުން އެމެރިކާގެ ޝަރުތުތަކަށް އެއްބަސްނުވުމުން ރައީސް ޑޮނަލްޑް ޓްރަމްޕް ނިންމެވި ނިންމެވުމެކެވެ. ޓްރަމްޕް ސޯޝަލް މީޑިއާގައި ވިދާޅުވީ އީރާނުގެ ނިއުކްލިއާ ހުވަފެންތައް ދޫކޮށްނުލަނީސް މި ބްލޮކޭޑް ކުރިއަށްދާނެ ކަމަށެވެ.
މިދިޔަ ހަފުތާ ބަންދުގައި ކުރިއަށްދިޔަ މަޝްވަރާތަކުގައި އެމެރިކާގެ ވަފުދުގެ އިސްވެރިއަކަށް ހުންނެވި ވައިސް ޕްރެޒިޑެންޓް ޖޭޑީ ވެންސް ވިދާޅުވީ، ދެ ގައުމުގެ ދެމެދުގައި ބޮޑެތި ހިޔާލުތަފާތުވުންތައް އެބަހުރި ކަމަށެވެ. މި ބްލޮކޭޑްގެ ސަބަބުން ދުނިޔޭގެ ބާޒާރަށް އީރާނުން ފޮނުވާ ދެ މިލިއަނެއްހާ ތެޔޮ ފީފާ މަދުވެގެންދާނެއެވެ. މީގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލި، އިގްތިސާދަށް ބޮޑެތި ލޮޅުންތަކެއް އަރާނެ ކަމަށް މާހިރުން ބުނެއެވެ. އީރާނުން ބުނެފައިވަނީ މިއީ ހަނގުރާމައިގެ އަމަލެއް ކަމަށާއި، މިކަމަށް ވަރުގަދަ ރައްދެއް ދޭނެ ކަމަށެވެ.
އެމެރިކާގެ އަސްކަރިއްޔާއިން ބުނީ މި އޮޕަރޭޝަން ކުރިއަށްދާނީ ހަމައެކަނި އީރާނުގެ އުޅަނދުތަކަށް އަމާޒުކޮށްގެން ކަމަށާއި، ހޯރްމުޒް ކަނޑުއޮޅިން ދަތުރުކުރާ އެހެން ގައުމުތަކުގެ އުޅަނދުތަކަށް ހުރަހެއް ނޯންނާނެ ކަމަށެވެ. ނަމަވެސް އީރާނަށް ތެޔޮ ވިއްކާ ނުވަތަ އެ ގައުމުން ތެޔޮ ގަންނަ އުޅަނދުތައް ހުއްޓުވާނެ ކަމަށް ބުންޏެވެ. މިހާތަނަށް ނޭޓޯގެ ބައެއް ގައުމުތަކުން މި ބްލޮކޭޑްގައި ބައިވެރިވާން ދެކޮޅު ހަދާފައިވާއިރު، ޗައިނާ ފަދަ އީރާނުގެ ތެޔޮ ގަންނަ ގައުމުތަކުން މިކަމާ މެދު އަމަލުކުރާނެ ގޮތެއް ބަލަން ދުނިޔެ މިހާރު އޮތީ ސަމާލުވެފައެވެ.