ސަރުކާރުގެ "ބޯހިޔާވަހިކަން އެންމެނަށް" ސިޔާސަތުގެ ދަށުން މާލެ ސަރަހައްދުން ދޫކުރާ ގޯއްޗާއި ފްލެޓަށް އެދި ހުށަހެޅުމުގެ މުއްދަތު، އަންނަ މެއި މަހުގެ ނިޔަލަށް އިތުރުކޮށްފިއެވެ.
މީގެކުރިން މި މަހުގެ 30 އަށް ސުންގަޑި ހަމަވާގޮތަށް އޮތް ނަމަވެސް، ހައުސިންގ މިނިސްޓްރީން މިހާރު ވަނީ ފޯމު ހުށަހެޅުމުގެ ފުރުސަތު މެއި 31 ވާ އާދިއްތަ ދުވަހުގެ ރޭގަނޑު 23:59 އާ ހަމައަށް އިތުރުކޮށްފައެވެ. މިއީ ވީހާވެސް ގިނަ ރައްޔިތުންނަށް ބޯހިޔާވަހިކަމުގެ ފުރުސަތު ފަހިކޮށްދިނުމަށްޓަކައި ގެނައި ބަދަލެއް ކަމަށް އެ މިނިސްޓްރީން ބުނެއެވެ.
މި މަޝްރޫޢުގެ ދަށުން ގްރޭޓަރ މާލެ ސަރަހައްދާއި ރަސްމާލެ ހިމެނޭހެން 15,000 ގޯތި ދޫކުރުމަށް ވަނީ ހަމަޖެހިފައެވެ. މީގެ އިތުރުން 7,900 ފްލެޓް ދޫކުރާއިރު، އޭގެ ތެރޭގައި މާލޭގެ ރަށްވެހިންނަށް ޚާއްޞަ ކުރެވިފައިވާ 4,000 ފްލެޓާއި، މާލޭގައި ދިރިއުޅޭ އެހެން ރަށްރަށުގެ މީހުންނަށް ކަނޑައަޅާފައިވާ 1,500 ފްލެޓް ހިމެނެއެވެ. ބާކީ 2,400 ފްލެޓް ދޫކުރުމަށް ހަމަޖެހިފައިވަނީ ޚާއްޞަ އިސްކަންދޭ ކެޓަގަރީތަކަށެވެ.
ސަރުކާރުގެ އަމާޒަކީ މި ސިޔާސަތުގެ ދަށުން ބޯހިޔާވަހިކަމަށް ބޭނުންވެފައިވާ ހުރިހާ ރައްޔިތުންނަށް އިންސާފުވެރިކަމާއެކު ފުރުސަތު ފޯރުކޮށްދިނުމެވެ.