ވެލައަކީ ވަރަށް އާދަޔާ ހިލާފު ޖަނަވާރެއް. މޫދުގައި އުޅުނަސް ވައިގެ ތެރެއަށް ނޭވާލާ ޖަނަވާރެއް. މޫދުގައި ބިސްދީ އުޅުނަސް އެއްގަމަށް ބިސްއަޅާ ޖަނަވާރެއް. ވެލާ ބިސްއަޅަނީ ރަށްރަށުގެ ގޮނޑުދޮށްތަކުގައި ވަޅުކޮނެގެން. އަދި ބިސްއެޅުމަށްފަހު އެ ވަޅު ފަސްލުމަށްފަހު ވެލާ ފައިބައިގެންދޭ. މިގޮތައް ވެލާ ބިސްވަޅެއްގައި އެތައްބައިވަރު ބިސް ހުންނާނެ. ވެލައާ ބެހޭ ބައިވަރު މައުލޫމާތު އަހަރެމެން ދަންނަމު. ނަމަވެސް މިއީ ފަހަރުގައި އައު މައުލޫމާތަކަށް ވެދާނެ. ބިހުގައިވާ ވެލާގެ ޖިންސު ކަނޑައެޅެނީ ކިހިނެއްކަން އިނގެނީ ކިތައްމީހުނަށްބާ. ވެލާ ބިސްވަޅެއްގައި ބިސްތައް ކައިރި ކައިރީގައި ހުއްޓަސް ބިސްތައް ވަނީ ވެލިން ވަށާލެވިފަ. ފަސްގަނޑުގެ އަޑީގައި ބިސްތައް ހުންނަ އިރު ބިހުގެ ވަށައިގެންވާ ފަސްތަކުގެ ފިނި ހޫނުމިނަށް އެކިފަހަރު ބަދަލުވޭ. މިގޮތައް އެ ފަސްގަނޑުގެ ފިނިހޫނުމިން ބަދަލުވާނަމަ ބިހުގެ ފިނިހޫނުމިނަށްވެސް އަސަރުކުރޭ. މި ފަސްގަނޑުގެ ފިނިހޫނުމިން ހުންނަ މިންވަރަކީ ވެލާގެ ބިހުގައިވާ ކުޑަ ވެލާގެ ޖިންސު ކަނޑައަޅާ މަސްދަރު. އެގޮތުން އެ ފަސްގަނޑުގެ ފިނި ހޫނުމިން ދަށްނަމަ، މާނައަކީ ފިނި ނަމަ އެ ބިހެއްގައިވާ ވެލާ ވެގެންދަނީ ފިރިހެން ވެލައަކަށް. އަދި ހަމަ އެގޮތަށް އެ ފަސްގަނޑުގެ ފިނިހޫނުމިން މަތިނަމަ، މާނައަކީ ހޫނު ނަމަ އެ ބިހެއްގައިވާ ވެލާ ވެގެންދަނީ އަންހެން ވެލައަކަށް. މި ނިޒާމު ތަރުތީބު ވަނީ ބިހުގެ ތެރޭގައި ހުންނަ ޖެނެޓިކްސް އެކުލެވޭ ކުރޮމޮޒޯމްސް ތަކަށް އަންނަ ބަދަލަކުން. ސައިންސުވެރިން ބުނާ ގޮތުގައި މި ދުވަސްވަރު އަންހެން ވެލާ ގިނަވެފާ ފިރިހެން ވެލާ މަދުވާ އެއް ސަބަބަކީ ދުނިޔެ ހޫނުވުން. އެގޮތުން ވެލާ ބިސްއަޅާ އަތިރިމަތި ތަކުގެ ފަސްގަނޑުވެސް ހޫނުކޮށް ހުރޭ. ނަތީޖާއަކީ އަންހެން ވެލާ ގިނަވުން ކަމަށް ދިރާސާކުރާ ސައިންސުވެރިން ބުނޭ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން