އަތޮޅު ކައުންސިލްތަކާއި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ މިނިސްޓްރީ އުވައިލި ނަމަވެސް، ގާނޫނީ އެއްވެސް ހުސްކަމެއް ނާންނާނެ ކަމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން ބުނެފިއެވެ. އެލްޖީއޭގެ އޮފީހުން ނެރުނު ބަޔާނެއްގައި ބުނީ، އަތޮޅު ކައުންސިލްތައް އުވައިލުމުން ގާނޫނީ މައްސަލަތަކެއް ކުރިމަތިވާނެ ކަމަށް ސޯޝަލް މީޑިއާގައި ދެކެވޭ ވާހަކަތަކަކީ ހަގީގަތެއް ނޫން ކަމަށެވެ.
އެލްޖީއޭ އިން ބުނީ، ލާމަރުކަޒީ ގާނޫނަށް ގެނެވުނު 17 ވަނަ އިސްލާހުގެ ދަށުން، އަތޮޅު ކައުންސިލްތަކުން ފޯރުކޮށްދެމުންދިޔަ ހިދުމަތްތައް އެލްޖީއޭގެ ދަށުން ދިނުމަށް މިހާރު ހަމަޖެހިފައިވާ ކަމަށެވެ. އަދި އަތޮޅު ކައުންސިލްތަކުގެ ވަސީލަތްތަކާއި މުދަލާ ގާނޫނީ ގޮތުން ހަވާލުވާނީ އެލްޖީއޭ އިން ކަމަށާއި، އެ އިދާރާގެ އޮފީސްތައް ރަށްރަށުގައި ގާއިމްކުރުމުގެ އިހުތިޔާރު ގާނޫނުން ލިބިދީފައިވާ ކަމަށްވެސް އެލްޖީއޭ އިން ބުންޏެވެ.
ސަރުކާރުން ބުނި ގޮތުގައި، މިހާރު ހިނގަމުންދާ އަތޮޅު ކައުންސިލްތަކުގެ ދައުރު ހަމަވުމުން އެ ތަންތަން ބަދަލުވާނީ އެލްޖީއޭގެ ދަށުން ހިންގާ އޮފީސްތަކަށެވެ. މީގެ ސަބަބުން ކައުންސިލްތަކުގެ މުވައްޒަފުންނަށް ވަޒީފާގެ ރައްކާތެރިކަން ކަށަވަރުވެ، ހިދުމަތްތައް މެދުނުކެނޑި ކުރިއަށް ގެންދެވޭނެއެވެ. މި ބަދަލު ގެންނަން ނިންމީ ރަށު ކައުންސިލްތަކާއި ސަރުކާރާ ދެމެދު ހުރި އިދާރީ ހުރަސްތައް ނައްތާލައި، ހިދުމަތް ދިނުން މިހާރަށްވުރެ ހަރުދަނާ ކުރުމަށެވެ.