މެދުއިރުމަތީގެ ހަނގުރާމަތައް ހުއްޓާލުމުގެ އުންމީދު ބޮޑުވެ، މަސްރަހު ފިނިވާން ފެށި ނަމަވެސް، ދުނިޔޭގެ ބާޒާރުގައި ތެލުގެ އަގު ވަގުތުން ހެޔޮނުވާނެ ކަމަށް އިގްތިސާދީ މާހިރުން އިންޒާރު ދީފިއެވެ. އީރާނުން ހޯމުޒް ކަނޑުއޮޅި ހުޅުވާލައި، އިސްރާއީލާއި ލުބުނާނާ ދެމެދު ސުލްހައިގެ އެއްބަސްވުންތަކެއް އިއުލާނު ކުރި ނަމަވެސް، ތެލުގެ އަގު ކުރީގެ ހުރި މިންވަރަށް ތިރިވާން އަދި ހަފުތާތަކެއް ނުވަތަ މަސްތަކެއް ނަގާނެ ކަމަށް ބެލެވެއެވެ.
އިގްތިސާދީ މާހިރުން ބުނާ ގޮތުގައި، އަގު ހެޔޮވުން ލަސްވާ އެންމެ ބޮޑު އެއް ސަބަބަކީ ތެޔޮ ސަޕްލައި ކުރުމުގެ ނިޒާމަށް (ސަޕްލައި ޗެއިން) އައިސްފައިވާ ބުރޫއެވެ. ދުނިޔޭގައި ބޭނުންކުރާ ތެލުގެ 20 އިންސައްތަ ދަތުރުކުރާ ކަނޑުގެ ސަރަހައްދު ބަންދުވެފައި އޮތުމުން އުފެދުނު ދަތިތަކުން އަރައިގަނެ، ހަލާކުވެފައިވާ ވަސީލަތްތައް މަރާމާތުކޮށް އާންމު ހާލަތަކަށް ރުޖޫއަވާން ގިނަ ވަގުތު ބޭނުންވާނެއެވެ. މީގެ އިތުރުން، ބާޒާރުގައި އަގުތައް މައްޗަށްދާ ވަރަށްވުރެ ތިރިވާލެއް ލަސްވުމަކީވެސް އާންމު ކަމެކެވެ.
އީރާނުގެ ނިންމުމާއެކު ސާފުނުކުރާ ތެލުގެ އަގު މިހާރު 10 އިންސައްތަ ދަށަށް ގޮސްފައިވީ ނަމަވެސް، މިއީ ހަނގުރާމަ ފެށުމުގެ ކުރިން އަގުތައް ހުރި މިންވަރަށްވުރެ އަދިވެސް މަތީ އަދަދެކެވެ. އެމެރިކާގެ ރައީސް ޑޮނަލްޑް ޓްރަމްޕްވެސް ވަނީ ތެލުގެ އަގު ހެޔޮކުރުމަށް ވަގުތު ނަގާނެ ކަމަށް ވިދާޅުވެފައެވެ. ތެލުގެ އަގު މަތީގައި ހުރުމުގެ ސަބަބުން މުދާ އުފުލުމާއި ދަތުރުފަތުރުގެ އަގު ބޮޑުވެ، އިންފްލޭޝަންގެ މައްސަލަ ދުނިޔޭގެ ހުރިހާ ގައުމުތަކަށް ވަނީ ބޮޑު ގޮންޖެހުމަކަށް ވެފައެވެ.