ސިޙުރަކީ ހަމައެކަނި ލޮލަށް ފެންނަ ކުލަވަރެއް ނުވަތަ ޚިޔާލީ ކަމެއް ނޫނެވެ. އިސްލާމްދީނުގައި ސިޙުރަކީ އޭގެ ނުބައި އަސަރު އިންސާނުންނަށް ފޯރާ، ޙަޤީޤީ އެއްޗެއްކަން ވަނީ ބަޔާންކޮށްދީފައެވެ. ސިޙުރުގެ ސަބަބުން އިންސާނާގެ ހަށިގަނޑަށާއި، ނަފްސަށާއި، އަދި ދިރިއުޅުމަށް ބޮޑެތި ގެއްލުންތަކެއް ލިބިދާނެއެވެ. މިއީ އިންސާނުންނަށް ބޮޑެތި އިމްތިޙާނުތަކަކާ ކުރިމަތިލާންޖެހޭ، ނުބައިވެގެންވާ އަމަލެކެވެ.
ކީރިތި ޤުރުއާނުގައި ސިޙުރުގެ ނުރައްކާތެރިކަމާއި އޭގެ ސަބަބުން ދެމަފިރިން ދޭތެރޭ ޖެހޭ މައްސަލަތައް ބަޔާންކުރައްވާފައިވެއެވެ. ސޫރަތުލް ބަޤަރާގެ 102 ވަނަ އާޔަތުގައި މާތް ﷲ ވަޙީކުރައްވާފައިވެއެވެ. "فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ" މާނައީ: "ދެން ފިރިމީހާއާއި އޭނާގެ އަނބިމީހާއާ ދެމެދު ވަކިކުރުން އެ ދެމަލާއިކަތުންގެ ކިބައިން އެއުރެން އުނގެނެތެވެ." މި އާޔަތުން އެނގިގެންދަނީ ސިޙުރަކީ އާއިލީ ގުޅުންތައް ކަނޑާލައި، އިންސާނުންގެ ދިރިއުޅުން ބަރުބާދުކޮށްލުމުގެ ބާރު ލިބިގެންވާ އެއްޗެއް ކަމެވެ.
ކަން މިހެން އޮތް ނަމަވެސް، ސިޙުރަކީ އަމިއްލަ ޒާތުގައި އެއްވެސް ބާރެއް ލިބިގެންވާ އެއްޗެއް ނޫނެވެ. މާތް ﷲ އިރާދަކުރައްވައިފި އަޅަކަށް މެނުވީ، އެއްވެސް ސިޙުރުވެރިއަކަށް އެއްވެސް މީހަކަށް ގެއްލުމެއް ނުދެވޭނެއެވެ. ސިޙުރަކީ އެކަމުގެ ސަބަބުން އެއްވެސް ހެވެއް ނެތް، ގެއްލުން ހުރި ކަމެކެވެ. ސިޙުރު ހަދާ މީހުންނާއި އެކަން ކުރާ މީހުން ވަނީ ދީނީ ގޮތުންނާއި ރޫޙާނީ ގޮތުން ވަރަށް ބޮޑު ނުރައްކަލެއްގެ ތެރޭގައެވެ. އެއީ އާޚިރަތް ދޫކޮށް ދުނިޔޭގެ ވަގުތީ ފައިދާއަކަށްޓަކައި ކުރެވޭ ބޮޑުވެގެންވާ ފާފައެކެވެ.
އިސްލާމްދީން ވަނީ މިފަދަ ނުބައި ކަންކަމުން ރައްކާތެރިވުމުގެ މަގު ދައްކަވައިދެއްވާފައެވެ. ސިޙުރުން ސަލާމަތްވުމަށް އޮތް އެންމެ ވަރުގަދަ އައްޑަނައަކީ މާތް ﷲ ގެ ކިބައިން ރައްކާތެރިކަން ހޯދުމެވެ. މިގޮތުން ކީރިތި ޤުރުއާން ކިޔެވުމާއި، ޚާއްޞަކޮށް ސޫރަތުލް ބަޤަރާ، ސޫރަތުލް ފަލަޤް އަދި ސޫރަތުލް ނާސް ފަދަ ސޫރަތްތައް ކިޔަވައި ރައްކާތެރިކަން ހޯދުމަށް އިސްލާމްދީން ބާރުއަޅައެވެ. އީމާންތެރިކަން ވަރުގަދަކޮށް، ޛިކުރުތައް ކުރުމަކީ ސިޙުރުގެ ނުބައިކަމުން އިންސާނާ ސަލާމަތްކޮށްދޭނެ ކަމެކެވެ.
މަޝްހޫރު ޢިލްމުވެރިޔާ މުފްތީ މެންކު ބަޔާންކުރައްވާ ގޮތުގައި، ސިޙުރާއި އެނޫންވެސް ނުފެންނަ ނުރައްކާތަކުން ސަލާމަތްވުމަށްޓަކައި މީހާގެ ރޫޙާނީ ދިފާޢީ ނިޒާމު ވަރުގަދަކުރުމަކީ ކޮންމެހެން ބޭނުންތެރި ކަމެކެވެ. އެކަލޭގެފާނު އަބަދުވެސް ނަޞޭޙަތްތެރިވެލައްވަނީ، ސިޙުރުވެރިންގެ ބާރަށްވުރެ މާތް ﷲ ގެ ކުޅަދުންވަންތަކަން މާ ބޮޑުކަން ހަނދާންކޮށް، ބިރުގަތުމުގެ ބަދަލުގައި އިތުބާރު ކުރަންވީ އެކަލާނގެއަށް ކަމަށެވެ. އަދި ހެނދުނާއި ހަވީރުގެ ޛިކުރުތަކަށް ފަރުވާތެރިވުމާއި، ފަރުޟު ފަސް ނަމާދު ބަރާބަރަށް އަދާކުރުމަކީ އިންސާނާގެ ވަށައިގެންލެވޭ ރައްކާތެރިކަމުގެ އައްޑަނައެއް ކަމުގައި އެކަލޭގެފާނު ފާހަގަކުރައްވައެވެ. ސިޙުރުގެ އަސަރުން ސަލާމަތްވުމަށް އޮތް އެންމެ ފަސޭހަ އަދި އެންމެ ވަރުގަދަ މަގަކީ މާތް ﷲ އާ އޮންނަ ގުޅުން ބަދަހިކުރުން ކަމަށް މުފްތީ މެންކު ތަކުރާރުކޮށް ވިދާޅުވެއެވެ.
އަޅުގަނޑުމެންގެ ތެރެއިން ބަޔަކު މި ހަޤީޤަތްތައަ ގަބޫލުނުކުރި ނަމަވެސް ސިޙުރަކީ ޙަޤީޤަތެއް ކަމާއި އޭގެ އަސަރު އިންސާނުންނަށް ކުރާނެކަމީ ދުނިޔެ ސާބިތުކޮއްދޭ ކަމެކެވެ. ނަމަވެސް އެއްވެސް ޙާލެއްގައި ސިޙުރުވެރިއެއްގެ ބާރު މާތް ﷲ ގެ ކުޅަދުންވަންތަކަމަށްވުރެ ގަދައެއް ނުވާނެއެވެ. ކޮންމެ ކަމެއްވެސް ހިނގަނީ އެކަލާނގެ މިންވަރުފުޅާއެކުގައެވެ. އެހެންކަމުން، ސިޙުރުގެ ބިރުވެރިކަމަށްވުރެ ބޮޑަށް މާތް ﷲ ގެ ރައްކާތެރިކަމަށް އެދި ދެންނެވުމާއި، ދީނީ ކަންކަމަށް ފަރުވާތެރިވުމަކީ ކޮންމެ މުސްލިމަކަށްމެ އޮތް އެންމެ ރަނގަޅު ގޮތެވެ.
ހަވާލާ: މުފްތީ މެންކުގެ ދަރުހަކުން 2026.