ބޭންކް އޮފް މޯލްޑިވްސް (ބީއެމްއެލް) އިން އާންމުކޮށްފައިވާ ގޮތާ ހިލާފަށް، ކާޑުން ކުރާ ހުރިހާ މުއާމަލާތަކުން 30 ޕަސެންޓްގެ ފީއެއް ނަގަމުންދާ ކަމަށް ބުނެ ސޯޝަލް މީޑިއާގައި ދައުރުވަމުންދާ މައުލޫމާތުތައް އެ ބޭންކުން ދޮގުކޮށްފި އެވެ.
ބީއެމްއެލްގެ ހެޑް އޮފް ބްރޭންޑިން އެންޑް މާކެޓިން ސްޓްރެޓެޖީ، މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، އެފަދަ ވާހަކަތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ.
ކަން ހިނގާ ގޮތުގެ ސާފު ތަފްސީލު:
ވަކި ސައިޓްތަކަށް: 30 ޕަސެންޓްގެ ފީ ނަގަނީ ޖުލައި 2025 އިން ފެށިގެން ވަކި އީ-ކޮމާސް ސައިޓްތަކަކުން (ޓީމޫ، ޝެއިން، އަލީބާބާ، އަލީއެކްސްޕްރެސް، ލަޒާޑާ އަދި އީބޭ) އެކަނި ކަމަށެވެ.
އެހެނިހެން މުއާމަލާތްތައް: ސިއްހީ ހިދުމަތާއި، ތައުލީމާއި އަދި ދަތުރުފަތުރުގެ ދާއިރާގެ އިތުރުން އެތައް ސަތޭކަ މާރޗަންޓުންނަކަށް މިފަދަ ފީއެއް ނަގަމުން ނުދާ ކަމަށް ބޭންކުން ކަށަވަރުކޮށްދެ އެވެ.
ކްރޮސްބޯޑާ ފީ: ބޭންކުގެ 'ޝެޑިއުލް އޮފް ޗާޖަސް' ގައިވާ ގޮތުން ރާއްޖެއިން ބޭރުގައި ކުރާ މުއާމަލާތްތަކަށް ދިވެހި ރުފިޔާ އެކައުންޓަށް ދޫކޮށްފައިވާ ޑެބިޓް ކާޑު ބޭނުންކުރުމުން ކްރޮސްބޯޑާ ފީއެއް ނެގިދާނެ ކަމަށާއި، މިއީ ދުނިޔޭގެ އެހެން ބޭންކުތަކުން ވެސް އަމަލުކުރާ އާންމު އުސޫލެއް ކަމަށް ބޭންކުން ބުންޏެވެ.
މި ނިންމުމަކީ ވަކި ބަޔަކަށް އަމާޒުކޮށް ނުވަތަ ސިއްރިއްޔާތުގައި ނިންމާފައިވާ ނިންމުމެއް ނޫން ކަމަށް ވެސް ބޭންކުން ފާހަގަކުރެ އެވެ. އަދި މިފަދަ ދޮގު ވާހަކަތައް ފަތުރަނީ ގައުމުގެ އިގްތިސާދީ ހަމަޖެހުން ނަގާލައި، ބޭންކުގެ އިތުބާރު ކުޑަކޮށް، މާލީ ރައްކާތެރިކަމަށް ނުރައްކާ ކުރުމުގެ މަގުސަދުގައި ކަމަށް ބޭންކުން ކަންބޮޑުވުން ފާޅުކޮށްފައިވެ އެވެ.
އެހެންކަމުން، މިފަދަ ދޮގު މައުލޫމާތުތަކަށް ސަމާލުކަން ނުދިނުމަށާއި، ބޭންކުގެ ރަސްމީ ވަސީލަތްތަކުން ހާމަކުރާ މައުލޫމާތުތަކަށް އެކަނި ރިއާޔަތް ކުރުމަށް ބޭންކުން ވަނީ ކަސްޓަމަރުންނަށް އިލްތިމާސްކޮށްފަ އެވެ.